En 1964, la reprezentasion teatral se metio en shena por la primera vez en Broadway, USA i tuvo grande sukseso.
Los spektadores, durante 8 anyos sin interupsion, incheron las salas i rompio el rekor de su tiempo en los Estados Unidos.
Resivio el premio TONY.
El senaristo reputado, JOSEPH STEIN i la musika de JERRY BOCK, kon la ovra fenomenal Anatevka (version en Turko), mos konta la trajedia de los judios atados a sus tradisiones ke bivian kon difikultades en Rusia.
En este kazaliko de judios bivian una famiya: El lechero Tevye, su mujer Golde i sus 4 ijas. Malgrado las sufriensas, no mankan de kantar kon el violon, rengresiando i rogando al Dio.
Oy en diya, es el djugo el mas popular en el mundo, kon su muzika SUNRISE SUNSET ke se egzekuta en las seremonias de kazamiento.
Antes 49 anyos, en Estambol (Atatürk Kültür Merkezi) el djugo mos avia enkantado. Penso ke no uvo judios ke no korrieron por no mankar la performansa maraviyoza. El 25 de Enero, 2018, despues de tantos anyos, tuve la suerte de ser prezente a la reprezentasion muzikal renovada: “IF I WERE A RICH MAN”.
Una performansa fastidioza!
Me emosioni MAS I MAS del sujeto ke mos aze ARREBOLTANEAR EL KORASON...
SIGLOS I SIGLOS, MUESTROS KORRELIJIONARIOS ERRARON I FUERON ARONDJADOS POR SER JUDIOS...
El djugo teatral mos konta el drama ke se paso en Rusia en el anyo 1905. Kuando el Tsar desida de arondjar los judios del kazal, se puede remarkar la dinyita del ser umano...
A la okazion de la piesa “Damdaki Kemancı”, IZZET BANA mos revelo sus kualidades artistikas teatrales ke deskuvrimos tambien en la piesa maraviyoza: “KULA ‘930” ke va tomar la shena otra vez el 7 de Febrero.
En un reportaje, los tres aktores sentrales mos dizen lo ke pensan del drama de los Judios: MEHMET ALİ KAPTANLAR. El rolo de TEVYE (el lechero) dize: “Aki es muestra kaza, muesto payis. Por ke razon devemos de ir i deshar la tierra de muestros avuelos?”
“Es muy amargo por la umanita. Yo lo esto viendo ansi.”
“Deshar la tierra! Anatevka no solo es un djugo de judios, esto puede afitarmos a todos.”
“Anyos pasaron, no aminguaron las sufriensas. Dingunos no se meten en kamino i se aleshan sin ser arrondjados.”
Oy en dia este drama egsizte: famiyas enteras estan sufriendo malorozamente.
BİNNUR KAYA (Golde) dize:
“El ser umano respektuozo a sus relijiones i sus kostumbres, mos dan el ekilibro; mos entendemos, ma en vezes devemos abandonar los uzos.”
ÖZGÜN ÇEVİK (el joven Perchik, el kontestador) dize: “Kontimos una istoria dramatika. Abandonar es para el ser umano una trajedia, ma el djugo es i komik - AKI ESTA LA MAJIA.”
Ay de saver adaptarmos i rezinyarmos a las difikultades i no piedrer la fey al Dio Poderozo.”
UN MUY GRANDE RENGRASIO A LOS AKTORES DE LA PRODUKSION FASINANTE!
Vos sueto Tu Bishvat alegre.
