Antes kuando una persona viniya a una sierta edad, se diziya ke ya no puede azer mas siertas kozas, kozas ke se diziya ke eran “echo de mansevos”. Ma oy, no mas ansi. Todos estan mirando de adelantarsen en la vida i azer kozas ke les plaze, kual ke sea sus edad.
En muestra komunidad, la persona ke konosi ke es la mas korajoza es Izzet Bana, ke kuando era mansevo desido de deshar su echo de komersio i tomo por misyon en la vida la muzika i el teatro. I reusho! Su dalkavo reushita esta ke toma parte en el muzikal profesyonal “Anatevka”. La djente pueden dizir: “Atyo, a esta edad?”. I yo les respondo, “No ay edad para gozarse de la vida en aziendo un echo ke uno kere de korason”. Bravo Izzet.
Un otro amigo es Alberto Modiano. Ya ay 34 anyos ke lavora en la fotografiya. I el empeso kon la kontabilidad ama la fotografiya fue su amor. I el reusho. Sus egzibisiones estan en todas las partes del mundo. I ke esta aziendo Alberto agora? Esta en la Universidad Bilgi, estudiando un poko mas filmo i fotografia. La djente dizen, “Atyo a esta edad?” I yo les digo, “No ay edad para ambezarse kozas muevas. No ay edad para azer lo ke te plaze.” Bravo Alberto.
