Keridas i Keridos,
Ya se izo muncho tyempo ke no vos eskrivo de komidikas ke mos plaze.
Por egzemplo “Kucharikas de Berendjena” ke me ambezi de mi kerida esfuegra Suzi, ke biva munchos anyos kon sanedad i repozo. De eya me ambezi gizar i ornar munchas komidas. Agora vos dare la resefta de esta savroza komida i ke vozotros lo gizesh i lo ofresesh a vuestros keridos.
Kucharikas de Berendjena:
5 u 6 berendjenas de las largas ke se yaman “kemer patlıcan”, 2 berendjenas bostan para asar i pikar, una kupa de kezo kasher rayado, un guevo, azete, sal i una piska de asukar.
Las berendjenas largas se van a kortar en dos a la larga i dospues a la anchor en tres.
Dunke se va formar sesh kayikitos. En una kaldera se mete agua i se kozen estos kayikitos fina ke se ablandan, se meten en un trepito para ke se eskurren bueno bueno i afilu se espriman un poko kon la mano. Se kita un poko de lo blando i se desha la kashkara kon un poko de berendjena. Esto blando ke lo apartimos de la kashkara se aze un gomo en mesklando los bostanes asados i el kezo kasher i la sal i lo amariyo del guevo, medyo findjaniko de kave de azete i la piska de asukar. Kon este gomo se inche en sima de las kashkaras, se apreta de los kenares i se forman komo kayikitos. En el tifsin se mete papel de ornar, se mete un poko de azete i enriva se duzudeyan las kucharikas. Se mete al orno a 200 grados kaji 40 minutos. i se kome kon alegriya, salud i beraha.
Agora ke ya se esta aserkando la fiesta de Purim vos kero dar otra resefta ke es spesyal para esta fiyesta.
Oznei Haman u Hamanteshen Aman u Orejas de Aman.
Es una forma de biskochikos en forma de triangolos (üçgen).
100 gramos de manteka, 100 gramos de asukar, un paketiko de vanilya, lo amariyo de 3 guevos, una piska de sal, una kucharika de rayadura de kashkara de limon u portokal i lo ke areyeva de arina, kaji 250 gramos para formar una masa blandika. En primero se meskla la manteka kon la asukar, dospues se adjustan los guevos, la arina, la vanilya, la piska de sal i la rayadura de limon. La masa se mete en un strech filmo i se desha repozar kaji una ora en el yelador. De esta masa se toma topizikos, se adelgaza en forma de redondikos. En medyo de estos redondikos se mete una kucharika de chokolata u una kucharika de marmelada de la ke se topa en kaza. Se forma triangolos en apretando puntikas. Ensima se unta kon furchika de lo amariyo del guevo, se orna 20 - 30 minutos en el orno kayentado a 180 grados. I se kome kon apetito (afiyet).
A todas i a todos keridos lektores vos oguro un buen Purim ke lo fyestemos kon alegriya i sanedad.
Al vermos.
