En el Mez de Adar munchas maraviyas se kumplieron para el Puevlo Djudio. El miraklo de Purim es uno de estos. Se esta aserkando Purim i el Taanit de Ester ke es siman importante de esta Fyesta. Oganyo, ampesando kon el Taanit Ester en el 13 de Adar (28 Febrero 2018), estamos selebrando la fyesta en el 14 de Adar i el Purim Shushan en el 15 de Adar. Shushan era la Kapitala del Imperio Persano: “…Andad arrekojer todos los djudios de Shushan, azed taanit vozotros por mi. Yo i mis donzeyas azeremos taanit de mizmo...” (Ester 4-16).
La Estorya de Ester ke todos konosemos muy bien, mos ensenya un milagro. Kada anyo repetarlo, estudyar tambien los livros de la Tora, mos ambeza la Istoria de muestro Puevlo, ken semos, de ande vinimos, ande vamos. Esto, por konsekuensa mos yeva a akodrarmos de muestras raizes, muestra lingua, muestras tradisyones i el dover de nunka olvidarlas.
En diversas epokas de la Istoria, en diferentes paizes del globo, los djudios fueron persekutidos. Munchas vezes fueron akuzados de no ser Fidel (leal) al estado ande biviyan. Kuala era la razon de estas persekusyones? Deke los djudios fueron akuzados? La kavza, la razon era el grande atadijo a sus raizes, a sus Fey i Tradisyones.
Avlando de tradisyon…Yo por egzempyo syempre tengo en mi memorya las Fyestas de Purim de mi chikes, mi manseves. Me akodro, mi Nono (de b.m.) kitava del almaryo la “Megila de Ester” de su kuti orijinal.
La Megila, el Taanit, las dulsuryas, los folares i mavlachas, los platikos i naturalmente el “harchlik” el “purimlik” ke mos davan los grandes despues de bezarles la mano. No me olvido las fyestas de PURIM de mi chikez. Se aziyan modos i maneras de dulsuryas, de biskochos ets… Mi Nona aziya en kaza afilu el “masapan” ke lo nombrava komo “almendrada”. No kero dizir ke no se esta azyendo oy tambien. Ma, agora devemos achetar ke no es lo de antes. Komo mos metiyamos a la sira para bezar las manos de los grandes i tomar el “purimlik”! Ke diyas eran!
Akodrarme de akeyos anyos de mi chikes seriya una nostaljiya, un eskarinyo? En la mezura del posivle estamos kontinuando muestras tradisyones. Portanto devo achetar ke no es lo mizmo de antes 60 o 70 anyos. El modo de vida troko ansi ke el entorno, vizinos ets. En todo kavzo, espero ke nada mos va impedir de kontinuar muestra tradisyon de Purim i otras fyestas, komo lo uzimos anyos i anyos.
