Antes dos semanas tuve la okazyon de ir a Israel un poko para echo, i un poko para la boda de la ija de mis keridos primos ke semos komo ermanos.
El alhad ke arrivi a Holon, bezos chupos kon la famiya, primos, primas, ijos, padres i pishin entri al mupak para preparar kozas savrozas para el dia de Mikve ke ivan a vinir 40 mujeres.
Aparejimos kon mi prima munchas savores sefaradis i dulsuryas. Veramente fue un dia reushido i muy enteresante para mi.
El dia de martes a las sesh, mos fuimos al Mikve kon la novya, su madre, su esfuegra, su tiya i yo. Despues ke entro al mikve una rabanit (mujer) le dyo una beraha i una orasyon a la novya ke la meldo kon grande emosyon. A la fin echimos bonbones enriva de eya i mos tornimos a kaza. Metimos una meza maraviyoza kon un orden ekstraordinaryo i munchas espesyalidades ke aprontimos kon muncho plazer. Despues del komer una Rabanit de 45 anyos vino para azer su misyon.
Enriva de una chika meza trushimos arina, azete, asukar i agua i un plato muy ondo; ande metyo la rabanit esto todo kon kuento i la yamo a la novya para ke meskle la masa por azer la primera Hala (evde yapılan ekmek). En mesklando la masa, la rabanit avlo sovre el kazamyento ke es una unyon sakra entre un ombre i una mujer.
Komo deven de komportarsen el uno kon el otro. Ke kale tener una pasensya, tolerensya i lo mas emportante kerensya i respekto.
A la fin de su avla trusho enriva la meza la alhenya (kına) i en metyendo enriva la mano un pedaso de alhenya de todas las amigas de la novya, la rabanit estava azyendo una orasyon.
En una tavla (tepsi) grande aviya 40 kandelas i asendedores (çakmak) en la meza. La rabanit mos disho de pensar a un dezeo ke keremos ke se afirme antes de asender la kandela. I despues kantes i bayles, la novya enriva la meza baylando kon sus amigas, estuvo un evenemento muy enteresante ke asisti kon grande plazer. Dos dias despues fue la boda en un lugar aryento las vedruras, un salon grande un lugar kalmo i maraviyozo ornado kon rozas blankas kon muncho gusto.
El novyo vino a poko a poko kon la madre i el padre muy elegantes, el un pasha, un luzyo, paresiya a un artisto suvyeron a la hupa i pasaron a sus lugares.
La novya kon kara riyendo, en medyo de su padre i de su madre arivo kon el fostan blanko bolando del ayre. Di ke paresiya a un pasharo. Una luzyika, el fostan muy simple ma muy ermozo. “Hadas” desho a su madre i padre ke se fueron a la hupa, eya aspero a “Tomer” ke vino a tomarla kantando i baylando.
El novyo la resivyo en dandole un beziko i le tapo el velo, i suvyeron a la teva. El haham kon su boz de seda empeso a azer la orasyon, todos sintyendolo kon muncha atansyon i emosyon. Kontinuando la orasyon, el haham envito al granpapa de la novya i a la granmama del novyo a la teva.
Munchos konosidos de diferente paizes, famiya, amigos, mansevos, todos kontentes, riyendo, avlando i komyendo en el kokteyl. La alegriya ke aviya estava koza de ver.
Despues pasimos al sigundo salon para komer. Un salon yeno de 500 personas, mezas ordenadas kon muncho gusto, yeno de rozas blankas.
Kuando empeso la muzika, Hadas i Tomer salyeron en medyo i baylaron muy grasyozos. Sus amigos i la djente estavan dando una felisidad i una atmosfera kayente.
Eyos ke tengan byen i mozos tambyen, orozos fina la fin. Mis ijos, tio, primo, ermano todos asityeron a esta boda de muestros primos keridos.
Una semana yena de evenementos sentimentales. Este viaje fue para mi muy provechozo, yeno de sentimyentos i de ermozuras i de reushidad sovre el punto de echo.
