Los invitados avian inchido la sala de teatro. El ombre aedado fue invitado tambien al program de televizion. Kuando entro en el salon, lo akompanyaron i le amostraron el fotolyo i lo instalaron en frente de la shena...
Enduna el salon entero se alevanto. Solo el aedado kuriozo, asentado, echo ojo para ver lo ke se estava pasando. Desidio de meterse en pies. El ombre ke guadro un sekreto durante 50 anyos, Nicholas Winton, no savia ke su mujer, Grete, le avia preparado esta seremonia para onorar su marido i no deshar olvidar el oror de los inosentes ke peryeron sus vidas.
El defter topado i el album bien guadrado de las kreaturas salvadas fue deskuvierto despues de 50 anyos i desvelo la realidad...
No savia tambien ke oy las 669 kreaturas judias ke avia salvado del Olokosto en 1938, estavan invitados en la mizma sala.
Avian pedrido sus parientes en los kampos de Auschwitz-Birkenau.
Sekretamente NICHOLAS WINTON pudo reushir a salvar las almas de los chikos guerfanos de la Chekoslovakia para fuyirlos a Britania. Se okupo de topar famiyas ke adoptaron las 669 kreaturas.
Kon palmas, despues de 50 anyos, estos chikos estavan presentes para rengrasiarle.
Nunka no mos vamos a olvidar de SIR NICHOLAS WINTON, ke peryo su vida en 2015. Tenia 106 anyos. Ke su alma repoze en Ganeden...
***
Keridos lektores,
La semana ke viene tenemos de kontarvos el orijen de un projekto de UNESCO...
