Ya ay kaji 45 anyos ke so profesora de inglez. En estos 45 anyos el mundo entero troko ma los sistemas de ensenyamiento de linguas no vido munchos trokamientos. Yene tenemos, livros, egzersisios, eskrivir devuares, ets. ets. todo esto metodos klasikos. Ay unos kuantos anyos ke me esto demandando komo es ke kale trokar estos sistemas para pueder alkansar a los mansevos de oy ke no son kresidos para adaptarsen a estos metodos antiguos. Si mirash a los mansevos de oy, vesh ke no uzan avlar por lo mas. Asentarsen en una meza i tener una konversasyon sin mirar los mesajes ke vienen al telefon no es posivle. Mizmo mozotros no puedemos estarmos sin mirar el telefon. La vida entera esta en el telefon. Le demandi a mi ija ke es el mijor modo de alkansar la manseves de oy si keres darles un mesaje o si keres ambezarles una koza, i eya me disho pishin “Instagram”. Le dishe, “I Facebook?”. Me dize, “Facebook es para los viejos!”. Atyo, ya mos izo viejos. Despues le demandi, “Bueno i ke me vas a dizir por Twitter?”. Me dize, “Los de mi edad (tiene 21 anyo) no estan sigiendo el Twitter, i esto se izo demode”.
Mozotros en el Sentro Sefardi, ya ay kuanto tiempo ke estamos bushkando medio para ensenyar el Judeo-Espanyol a los mansevos. Dos mansevos en el grupo, Henri Çiprut i Emel Benbasat pensaron ke puediamos empesar en ensenyando una palavra kada dia. Ke buena idea. A poko a poko se ambezan. Ke bueno. Empesimos a publikar una palavra kada dia en todos los medios sosyales. Despues de dos dias, una estudiante mia ke agora i eya es profesora de inglez me dize: “Avriremos un grupo en Whatsapp i ayi les embiyamos las palavras kada dia”. Le dishe ke era buena idea. Keridos amigos, no savesh komo de sukse izo esto! Mos undimos de mesajes de “mansevos” ke kerian venir al grupo. El limite de un grupo de Whatsapp es 250 personas. En 3 dias, ya mos izimos 250 personas (inkreivle!) i avrimos un sigundo grupo. Ken se imajinava ke aviya tanta djente manseva ke keriya reelmente ambezarsen la lingua. No puedesh imajinarvos la alegria ke tenemos. Esta semana vamos a tener una reunyon sovre esto i vamos a mirar komo puedemos ambezarles mas kozas. De verdad ke esto me esta dando una esperansa buena para el futuro.
