El anyo 2016 no fue tan agradavle para mi ni para mi famiya. Malorozamente en el empesijo del anyo peryi a mi kerida madre, el platano (çınar) de muestra famiya.
Mi madre, “Zelda NATAN”, era una persona muy kultivada, spiritual, kerensyoza, devuada, alegre, pozitiva, vizyonarya (vizyon sahibi), una mujer agradavle (hoş) de grande valor. “Ke su alma repoze en ganeden”…
En el mez de agosto fue la piedrita de la luz de mi vida, mi marido, “Meir GAON”, z”l; una persona sensivle, sensero, onesto, derecho, korekto, intimo, modesto, savido, kudyozo, amable, umanisto, un muy buen marido, buen padre, persona ke dava grande emportansa al amigable, sezudo (aklı-selim) i de munchas otras valores… Fui aharvada de estas dos peryitas; las personas las mas emportantes de mi vida. Mizmo ke las fyestas son muy alegres i ke todos los miembros de la famiya se arekojen, yo esto amargada en azyendo aparejos; todo el tiempo me esta vinyendo al tino mi madrizika kon mi maridiko kerido. Enfin la vida esta kontinuando i komo kada anyo arrekojo toda mi famiya las dos noches. El Dyo ya me esta dando la fuersa...
Pesah es antes de todo la komemorasyon de la salida de Ayifto de un puevlo esklavo ke tuvo el koraje de akseptar (al presyo de multiples difikultades i sufriensas) la insertidumbre de un egzodo al pareser interminavle, komo un largo enkaminamyento en direksyon de la libertad ke ekspresa el ermozo orgolyo i el immenso dezeo de estos ombres i mujeres de ser enfin “umanos independyentes en sus refuzo de syempre abokar la kavesa delantre el enemigo”.
Munchos livros mos kontan los dolorozos esforsos ke eyos tuvyeron en el dezyerto, los ojos kontinualmente fiksos sovre el movimyento de las nuves en el syelo, afin de topar eyos mizmos el kamino a segir.
De mezmo, Pesah mos anunsya el tyempo de arrekojer lo sembrado, lo ke es el endisyo de una populasyon ke (malgrado su destino de ser un punyado de umanos en kontinual migrasyon) tenia syempre en eya mizma ‘el eskarinyo intenso i la vokasyon de devinir una ‘Nasyon Estavle’ sovre una tyerra ke sera la suya.
La sia al torno de la meza familyal ke muestros ansestros deshavan inokupada asperando la venida del profeta Eliau i la puerta de la kaye ke kedava medya avyerta para el pasante ke kereria entrar i paskuar kon eyos, ekspresan el ovligo de solidaridad i de ospitalidad entre todos los myembros del puevlo djudyo.
Si… la fyesta de Pesah es sin dubyo esto todo, i tambyen (lo ke es muy importante) el rekuerdo ke durante los 40 anyos de soledad en el dezyerto, muestros primeros abuelos resivyeron de la mano de sus giador, Moshe Rabenu, un kodigo en mizmo tyempo relijyozo i etiko-sosyal ‘El Dekalogo’, los dyez komandamyentos ke afirman muestros doveres no solo en direksyon de Dyo ma igualmente en direksyon de kualkyer kriansa umana kuala sea su Fey, lo ke mos konfirma la Biblia kon su kodigo de los ‘Syete komandamyentos de Noah’ destinado partikularmente a los ke no son djudyos afin de indikar ke ‘todos los ke lo observaran’ seran syempre konsiderados komo djustos entre los djustos, todo komo los djudyos ke observaran las preskripsyones del Dekalogo a ser una nasyon. Es el nasimyento de la nasyon djudiya. Es la fyesta de fundar un pais muevo, de la unyon i de la solidaridad.
Seyga riko, seyga prove; todos somos iguales (eşit) en el doredor de la meza de Seder. Es la fyesta ke ambezamos muestras tradisyones a muestros ijos i ijas. Pesah es el indisyo (gösterge) de la esperansa.
Mos aze akodrar ke nunka no kale ser dezesperados, mos konseja de ser syempre yenos de esperansa, porke muestro Bendicho Dyo mos ayuda en los momentos los mas difisiles.
Todas las famiyas se arekojen en el doredor de la meza de seder i se akodran de la lejenda de sus ansestros i transmeten la istorya de djenerasyon en djenerasyon. Todos endjuntos se melda la Agada de una boka, se kome, se beve, se kanta i la nochada se termina kon grande alegriya.
El Dyo ke mos ayege para kada anyo mijorado kon sanedad, kon todos djustos, pujados i non aminguados, Amen….
