“Los ijos de Israel kedaron 430 anyos en Misrayim. En el diya final de estos 430 anyos, todas las Armadas de Dio salyeron de la Tyerra de Misrayim. “Esta Noche (de Pesah) es la Noche de guardiya para el Dio al salir de Bnei Israel de las tyerras de Misrayim. Es la noche de Dio, i todos los ijos de Israel seyan guardianos de jenerasyon en jenerasyon... (SHEMOT-kap.12-V.41-42)”
Antes de entrar al sujeto kero embiyar mis saludos kordiales a la kerida Matilda Koen-Sarano i a Petah-Tikva ande bivyeron mis keridos djenitores z”l i otros paryentes. Kerida Matilda, te rengrasyo por el livro VEJES LIVYANA ke me mandates mezo mi ermaniko. Mos korrespondemos akuroto. Kada vez ke mos telefonamos, seya el, seya su espoza me kontan ke vos enkontrash kada vez ke vijitan el BEIT AVOT RECANATI. Kerida Amiga, te embiyo mis sinseros suetos de buena salud, ansi ke, a la okazyon de PESAH, HAG SAMEAH. MOADIM LESIMHA a todos los keridos i lektores.
Bueno! Mos estamos aserkando de Pesah. Komo lo savemos bien, el dono prensipal del Djudaismo es la “MEMORYA”, el akodrar. El byervo ZAHOR” es la yave de munchas MITZVOT i valores muestras. Es tambien la baza de muestro dia Santo, SHABBAT.
Me akodro del SEDER del anyo ‘42. No era una perioda alegre para la UMANIDAD, por konsekuensa, ni para mis serkanos. La Gerra kontinuando, mi Papa z”l, estava en la Armada. Vinyendo al SEDER del anyo ‘50… Fue el mas alegre entre los ke me akodro. Fue por primera vez akel anyo ke tuve la okazyon de azer el Seder en Tekirdağ, kon la mishpaha de mi kerida madre z”l. Fue tambien, el uniko ke tuve la posibilidad de pasar kon la ancha famiya maternal.
