La semana ultima tuve el plazer de konoser el Museo de Ayasofya (St. Sophie Museum) la noche, kon un gia (rehber) famozo “Ali Canip Olgunlu”.
Mordo Hazak i Cako Uyar dos amigos, dos haveres, un duo fabulozo estan azyendo viajes en la Turkiya i en la Evropa kon el nombre de “Biz Bize Tur” ke sinyifika un tur entre mozotros i estan organizando de una manera ekselente azyendo atansyon a los mas chikos detalyos para ke los partisipantes keden kontentes.
Los ke estan assistyendo a estos viajes estan tan kontentes ke sin terminar uno de los viajes ya se estan eskrivyendo al sigundo viaje.
Kualo aspera la persona ke viaja:
Un kamino, un paseo konfortavle (rahat), un entereso serkano (yakın ilgi), kerensya, karas riyentes, un entorno ke se puede azer amigavle, un otel limpyo, komidas espesyales i un gia savido ke eksplika todos los detalyos klaramente.
Estos detalyos los puedesh topar en este “Biz Bize Tur” ke todos los ke partisipan son komo una famiya.
Ayasofya es el museo el mas emportante ke egziste en la istorya entre todos los monumentos sovre la arkitektura (mimari), esplendor (azamet, büyüklük), i la ermozura.
Es la mas grande eglisya ke se konstruyo tres vezes en el mizmo lugar. Dingunos no pudyeron konstruyir un batimento komo Ayasofya sovre el punto de vista de arkitektura.
Aryento es una arkitektura Romana, afuera es una arkitektura Grega. La konstruksyon es muy rezya (sağlam), semantika (anlambilimsel) i fonolojika (sesbilimsel).
Fue un ponte entre los Romanos durante 1.100 anyos, i Otomanos durante 1.000 anyos.
Ay munchos simbolos aryento de este museo. Aryento puedemos ver kuatro rios (ırmak) diferentes.
La guerta del Paradiso es la kupula (kubbe) de Ayasofya. La chanaka sakra (Kutsal Kase).
Este museo da vida a Estambol. Izyeron akel tyempo una eskola relijyoza islamika (medrese) en la guerta.
La sensya (bilim) i la relijyon (din) syempre fueron endjuntos.
En el pensamyento mistiko (mistik düşünce) ay 12 kodreros ke son agravados (kabartma) i en el Sufizmo (Sufizm) el kodrero es muy emportante.
El numero 12 es un numero muy simboliko.
• 12 disiplos kristyanos (12 Havari),
• 12 ijos de Israel,
• 12 Dyo’s, ets... ets...
Ayasofya es el primer egzempyo de la sentez del arte, i la produksyon de la sentez del oryente (doğu) i del oksidente (batı).
Ayasofya se konvirtyo al museo kon el orden de Mustafa Kemal Atatürk. 01.02.1935 es la data de la avyertura komo museo a los envitados del pais i etranjeros.
Ayasofya es konosida komo una eglisya famoza del tyempo de los Bizantinos. En el anyo 1453, kuando Fatih Sultan Mehmet, el grande sultan de los Otomanos entro a Estambol i konkisto (fethetti) esta sivdad, esta eglisya se transformo en una meshkita ke fina 1935 ke se izo un museo, se utilizo por este buto.
Unos mozaikes de los mas vyejos, kon estreyas dores, en formas jeometrikas, kon motivos vejetales i munchas otras se topan en este museo.
El mozaik de oferta (sunu mozaiği) se topa enriva la puerta i es muy importante. Una forma simetrika ke en medyo se topa la madre de Jésus, Maria (Meryem), ke lo esta tenyendo en la pyerna. Este mozaik data del 10en siglo.
En el mozaik de dos andjelos en el Apsis puedemos ver en la derecha Gabriel i en la syedra Mikael. Este mozaik data del 9en siglo.
Fue una nochada fruktuoza (verimli) en el punto de vista de enformasyon, de konosimyento istoriko i el senso de los semboles kon los mozaikes. Siguramente ke el gia fue importante porke el es una persona muy kultivada i save transmeter su grande konosimyento. Remersyo
