Estos espasios yenos de likido fueron topados en el teshido konektivo del puerpo.
Rachael Rettner, en su artikolo del LiveScience el 27 de Marzo, 2018 disho ke fue una sorpreza grande para doktores de deskuvrir un organo muevo en muestros dias. Ama es verdad ke toparon una red de espasios yeno de likido ke no se aviya visto asta agora.
Estos espasios se toparon en el puerpo entero, debasho la piel (el kuero) i en todos los sistemas importantes. Dr. Neil Theise dize ke estos espasios son komo un otorut ke viaja el puerpo entero. Los investigadores disheron ke estos espasios no se vieron asta agora porke kuando se korta una parte del puerpo para estudiarlo debasho del mikroskop, el likido se fuye. Agora se esta viendo porke estan uzando muevas teknikas.
Este muevo organo, yamado por el momento, el Interstitium, tiene implikasiones importantes para investigasiones komo el kanser, ke no se saviya deke i komo el kanser se iva de un organo a el otro. Al pareser, esta uzando este otorut para irse de un lugar al otro!
Este muevo organo avryo el kamino para muevas investigasiones i tambien mos ambezo ke importante es la agua para muestro puerpo. Ya saviamos ke aproksimadamente 70% de muestro puerpo es agua ama agora kon este organo, echo de espasios yeno de likido, la agua augmenta en importansia. Ainda estan en el empesijo de las investigasiones, ma esto sigura ke lo ke van a topar en el futuro sera mas i mas interesante. Salud buena ke tengash!
