Sigundo diya de Pesah empesamos a kontar el Omer, un komandamiento de la Tora. A la fin de 49 diyas, en el 6 de Sivan (oganyo el 6 MAYO se eskapa kon la fyesta de Shavuot. En la Istoria de los djudios, la perioda de Omer fue markada por desgrasyas i kalamidades. Myentres la rezistensya de Shimon Bar Kohba kontra la dominasyon romana, muryeron munchos kombatantes djudios. Una leyenda Talmudika dize ke tambien en esta perioda nombrozos elevos del grande savyo “Rabi Akiva”(*) peryeron la vida en una epidemiya.
Es un periodo komemorativa de dolyo, no se aze selebrasyones komo bodas ets... En el 33. diya, el 18 de Iyar uvo un kalmo en las violensas. Este diya “Lag Baomer”, tiene apoyo sovre eventos istorikos. Es una festividad en el kalendario ebraiko ma no mensyonada en la “Biblia”. En Lag Baomer se aze divertimientos i selebrasyones, entre otras a la memorya de Rabbi Shimon Bar Yohay i su ijo Rabi Eliezer.
En el Monte Meron se topan sus tombas. La tradisyon dize ke eyos, durante 13 anyos se eskondyeron en una grota myentres las persekusyones de las fuersas romanas. El famozo Tanna Bar Yohay ke era dishiplo de Rabbi Akiva, aviya tambien tomado parte en la rebelyon kontra el Imperador Adrianus.
Omer, Sefira, Lag Laomer... byervos ke sintiya en mi chikes ma ke no entendiya... Eskrivyendo esto, kon una sonriza nostaljika otruna vez me fui a los anyos 40... Mi Nono (de b.m.) kontando el Omer me diziya “Mira Coya, oy es el treser... o el kinzen ets... diya del Omer”. Me dava eksplikasyones difisil de entender para una ninya de 7-8 anyos. Despues se adjusto el byervo “Sefira”. Mi madre (de b.m.) me lo ekspliko tan bueno ke fue para mi sinonimo de “defensa de lavrar, brodar i kuzir despues la aparisyon de las estreyas”…
Lag Laomer... este byervo era reelmente una enigma para mi! Pensava ke deviya ser una fyesta, ma en kaza no aviya dingun siman komo uzavamos en Purim o Pesah... Agora tornaremos a la Istorya. El Tanna Bar Yohay muryo el 18 Iyar, 33. diya del Omer. Desho de sava ke su muerte no seya kavza de dolyo, a la kontra ke se aga festividades. Asigun una leyenda, al murir de Bar Yohay, su kaza se incho de una luz i de un fuego ke turo diya entero. Ansi, en las selebrasyones de Lag Baomer del Monte Meron, a lo largo de la nochada se bayla, se kanta al doredor de las “fogatas, chikos fuegos asendidos en todas las partes del pais. Tuve la okazyon de ver estas festividades de Meron.
(*) Akiva Ben Yosef: (40-135) Grande savyo djudio. Su lavoro “Halaha” fue la baza de la Mishna. Su vida fue sujeto a nombrozos kuentos epikos i leyendas. Dizen ke Akiva era un pastor i, aedado de 40 anyos empeso a estudyar. Manaderos afirman ke su mujer Rahel lo apoyo durante largos anyos de estudyo. Akiva desvelopo el Midrash. La mayoriya de estas ovras eskritas en el 2. Siglo apartienen a su eskola.
Akiva es importante seya kon su personalidad, seya en tal ke savyo de la Ley. Fue tambien un grande protektor de los proves. Asigun Akiva, el prinsipal elemento del Judaizmo se topa en esta Mitzva: “Kere a tu vizino komo a ti propio.”. Egziste diversas opiniones sovre el rolo ke djugo Akiva myentres el solevantamiento de Bar Kohba kontra las fuersas romanas. (132-135). Manaderos afirman, akuzado de aver enflamado la rebelyon, el fue enkarserado por los romanos en la prezyon de Caesarea i egzekutido.
