El prens Harry de Inglatierra se kazo este Shabat pasado kon Meghan Markle, una aktrisa amerikana kon una boda a las mil maraviyas. El mundo entero les plaze ver estas bodas reales ke se organizan en paizes ande dainda ay reyes i reinas i los organizadores azen lo mijor posivle para ke se diga ke fueron bodas de fadas, majikas i maraviyozas. El kazamiento del Prens Harry no fue en las normas de la kaza real de Inglatierra. Tomo una mujer amerikana, kon madre preta (“arapika” dizeria mi madre), divorsiada i un poko mas aedada ke el. Si Harry era el eredor del trono, no kreyo ke le ivan a permeter ke se kazara kon esta mujer ma komo la erensia ya esta asegurizada (mizmo si en la vida nada es seguro) el se kazo kon su amor. I muy bueno izo. Meghan, si es aktrisa ma es tambien una luchadora para los derechos umanos, ayudadera a kavzos karitativos i en kurto es bien intelijente i karizmatika, ke son kalidades muy importantes en su posto muevo. Me suvyeron las lagrimas a los ojos en vyendo a su madre asentada sola en la iglesia, kon lagrimas de alegriya i de gloria en sus ojos por su ijika. Tambien me emosioni de ver ke el Prens Charles fue el ke la trusho a la novya dentro de la iglesia. El padre de Meghan no pudo vinir i esto me izo pena, de verdad dizirvos. Suetamos una vida yena de felisidad a los muevos kazados. Ke tengan felisidad i ke sus vida se realize komo un kuento de los de Disney, yena de majika.
