Muestra biyen renomada autora Reneta Sibel Yolak eskrivyo i publiko 2 livros. Sovre esto kije konoserla de mas serka i azerla konoser a los lektores del Şalom. Ize una entrevista kon eya donde vash a topar aki abasho lo ke avlimos.
Kontamos de ti. Puedriyas darmos detalyos de tu edukasyon i de tu lavoro.
Yo so Ankaraliya. Despues de eskapar el Kolej Ted en Ankara vinimos a Estanbol ande kontinui en el Lise Nishantash Anadolu. La universita la meldi en Boğaziçi i eskapi la seksyon de profesora de Inglez. Kompleti seminaryo de djurnalizmo en la mizma universita, despues meldi kursos en el Kolej de Lewinski para pueder tomar sertifikado de ensenyar en eskolas en Israel. I aparte tomi sertifikado de psikolojiya.
Vinyendo a mi echo. Lavori en munchas eskolas komo profesora, en la Universita de Boğaziçi, en el Işık Lise, Kolej Istek, Kolej Yildiz i munchas otras.
Mos puedes kontar de tu livro muevo ke es eskrito sovre el sujeto del Olokosto.
El nombre del livro es “Flores en la Solombra del Nazizmo” - “Naziler’in Gölgesinde Çölde Açan Çiçekler”. En este livro eskrivi istoryas verdaderas del tyempo del Olokosto. Son istoryas ke empesaron en la Alemanya en el tyempo de Hitler i ke se espandieron de la Alemanya a la Evropa entera. Mizmo Yad Vashem guadro komo sekreto syertos evenimyentos ma aki vash a meldar faktos reeles. La persona kale ke se ambeze el pasado. Kale ke tome estos faktos en konsiderasyon i ke no se olvide i ke no deshe a ser olvidado a todo lo ke se paso en la Sigunda Gerra Mondial. En el livro empleyi una lingua muy fluente para ke se melde fasilmente i en kurto tyempo.
Kontamos sovre tu sigundo livro.
El nombre del livro es “Ah Estas Mujeres” - “Ah Şu Kadınlar”. Komo ya se entendera del titolo, el sujeto es sovre las mujeres, sovre los tipos de mujeres.
Kualos son los premios (ödül) ke resivites?
Resivi 3 premios enternasyonales de kompozisyon muzikal, 2 premios en el Festiladino onde vine la primera. El Festiladino es konosido komo el Eurovision del Ladino. Resivi munchos otros premios sovre literatura, spor, muzika, pintura i aparte de estos 2 livros tengo otros 15 livros emprimados i 60 kompozisyones de muzika.
Es ke tyenes otros livros ke asperan a ser publikados?
Si ya tengo. I se yama “Inanclarin Mucizeye Dönüştüğü An” - El Momento donde la Fe se transforme en Miraklo”. Tengo otro livro eskrito en Ladino “Kolores del Mundo Ladino.”
Kualas son las reaksyones ke te dan tus lektores?
Komo los sujetos de mis livros son tomados de la vida reel, los lektores amostran reaksyones muy pozitivas; les plaze muncho meldar mis livros.
Kerida Reneta te oguro reushita buena, syempre ke estes adelantada i ke no eskapes nunkua de eskrivir. Te felisito de alma i de korason.
