Forti Barokas
Mi kerida amiga Karen Gershon me mando un sms dizyendo ke esta semana ay menester de eskrivir un artikolo en la pajina de jude-espanyol. Porke syertas amigas ke eskriven en esta pajina estan en vakansas i syertas no estan dispuestas. Alora este dover me kayo a mi. Komo torni mueva de la vakansa pensi de eskrivir la aventura ke pasi.
Keridos lektores, ya savesh ke agora se uza de pasar el enverano entero en Çeşme, Alaçatı u Bodrum, Gündoğan, Yalıkakavak… Las mujeres kon los ijos semana entera aya espasyandosen en las mijores playas, los ombres dezmazalados se van vyernes tornan lunes se arastan semana entera; esta manera salvan de ser demodes.
Munchas amigas me yaman demode porke no me vo a Bodrum i a Çeşme. Me dizen, dainda estas en la Ada???
Este anyo dishe me azere moderna i me ire a Bodrum a la kaza de mi ijo el grande. Lo veyo a mi inyetiziko ke ya me eskarinyi i paso unos kuantos diyas. Tomi el bilyeto de avion, apareji la validja, abashi a la eskala de Büyükada para tomar el motor de 7 para Kartal. Una djentorya, neysa ya me suvi al motor, abashi en Kartal, tomi un taxi para ir al aeroporto Sabiha Gökçen. Abasha la validja, pasa por la sekuridad, alevanta la validja, pasa por el polis... El avion iva partir a las oras 10, izo retar se alevanto a las 11. Bendicho el Dyo, ya abashi a Bodrum. Aspera la validja, no tuve ke azer kije yevarle a mi inyeto una bisikleta i por esto travi las makot de Paro. Sali afuera, la kalor murir yo aryento la sudor, mi ijiko ya me estava asperando, mos suvimos a la araba una ora de kamino para ir a su kaza. Yo de vista travi fotos, las meti al facebook i al instagram ke veyan ke ya esto en Bodrum i ya so moderna. Mi ijo desido de yevarme a una playa ke es muy popular. Ayde suvete a la araba, tashideya karucha de lastik, kuvos i paletas, tabandjas de agua i mil un djugetes de mar para el chiko, una ora de kamino, oh ya arivimos a la playa. Mis amigas me disheron vate a tala plaj te vas a dezmayar de la ermozura ke es. Yo me dezmayi en pagando un tost kon un ayran 45 liras! A la noche me disho mi ijo ke mos vamos a ir a komer pishkado. Yo ya kero kama i echarme ma no ay remedyo, ayde suvete a la araba, una ora de kamino mos fuimos a un restoran muy ermozo en el bodre de la mar, ya komimos pishkado maraviya… 4 personas 500 liras!
Me iva kedar 15 diyas ma a la otra demanyana troki el bilyeto de avion. 5 diyas ya me abasto de ser moderna; todos ke tengan muncho bueno yo torni a mi kaza. La Ada ke no me manke!
