Ay ocho anyos ke la Alliance Israelite Universelle endjuntos kon la Asosyasyon Aki Estamos estan organizando lo ke estan yamando la “Universidad de Enverano del Judeo-Espanyol” en Paris. Yo tuve la onor de partisipar en esta organizasyon unas kuantas vezes i este anyo me invitaron para ke avle en una meza redonda sovre las publikasiones en Judeo-Espanyol ke estamos aziendo en Turkiya i muestros proyektos para el futuro.
En estos 5 dias, ay munchas aktividades muy muy interesantes para los partisipantes. En kada dia ay ateliers de kante, lingua, kultura i mizmo ateliers para kreyaturas. En kada noche ay una aktividad kultural, sea de konsertos i sea de teatro ke este anyo van a tener la posibilidad de ver al skech de Moiz (Jojo Eskenazi) kon Fani Bonofiel i Solita Algazi. Ay aktividades para todo modo de interes. Ay munchos livros en vendida, todos sovre la kultura sefaradi i munchos en Judeo-Espanyol. Kada vez, los salones se yenan de djente interesados en muestra kultura. Ke bueno!
