Antes una semana pasi unos kuantos dias kon mi ija la grande i me rendi kuento ke las eskolas de las kreyaturas son muy emportantes por las madres. Yo ya tengo sesenta anyos i no troko ainda de los dias de mi chikes fina oy.
Yo kuando eskapi la eskola primera los estudyos de “eskola primaria” eran sinko anyos i no aviya el sistem de oy ke es 4+4. Kada eskola aziya su proprio egzamen. I todos asperavan los rezultados ke se eskrivieran en la gazeta.
Para prepararmos teniyamos una profesora ke teniya gatos i todos se ivan ande eya. Kuando sali del primer egzamen estava muy alegre porke me aviya vinido muy fasil. I mi madre disho “si estava tanto fasil, tu no ganates”! I hue ansina; no gani al Robert College. Despues entri al egzamen de la eskola ke eskapi St. Benoit. I me akodro ke aviya la demanda “Fatih Sultan Mehmet deke se iva muncho al sinema?” I la repuesta mira fue muy pratik “porke le plaziya”. I no me kuadro de dizir “no aviya sinema en akel tiyempo.” Para mi madre era fin del mundo si no puediya entar a un eskola franseza. Una noche, a las doz de la manyana, mi madre se hue a merkar la gazete para mirar las listas i les aprometyo a los amigos un pranso ke se diziya “rakı keyfi” en el balkon de la kaza de kampanya. A la fin yo ya estava en la lista i mi madre estava muy kontente. I mi parde gloriozo de dizir i de pensar ke sus ijos eran entelijentes.
Paso anyos, los estudyos en fransez no eran mas konsiderados populares. Para mis ijos pensimos ke iva ser mas mijor un kolej para anbezar en inglez. Egzamenes, profesores, kursos,vate por aki, ven por aya. Gano, no gano, yedek listas. Mi madre me disho ke nada no troko en los estudyos. Kuando todos los tres ya eskaparon la universita, la primera koza ke dishe es “buraya kadar benim işim bitti” (es asta aki, mi echo ya se eskapo).
Me paresyo ansina; este anyo me topi delantre del komputer a asperar los resultados de mi inyeta. Porke era un anyo muy difisil. En el empesijo del anyo ensupito alevantaron el egzamen ke se yamava TEOG. Komo tres kuatro mezes, dingunos no saviya komo se iva pasar. Los ijikos komo kavayos ke korren, tomaron livros de testes i a lavorar noche i dia. Si le demadavas a mi inyeta si kere bever una limonata te puediya dizir kon kualo se aze i de ande viyenen los limones i la agua, la asukar komo una shimista, dando formules antes de responder si u no. En el anyo 2018 no ay mas asperar gazetas, ni ir de una eskola a otra. Todas las enskripsiyones se estan azyendo “on line” i yo komo gramama teniya de avlarles para dizir ke esta eskola u otra no es emportante, el elevo ke seya elevo. Elevo bueno puede reushir en todo modo de lugar. Los estudyos son emportantes ma kale rogar al Dio “shans buena” i rankontres buenos.
A todos los elevos ke estan entrando a los egzamenes les esto augurando ke entren a las eskolas ke van a poder kontinuar fina la fin. I les esto dizyendo ke puedan reushir en la eskola de la vida.
No olvidar ke tenemos una eskola UÖML, la eskola djudia, donde los estudyos i los profesores son muy seriozos. Amigos, amigas, tradisyones i todo modo de komoditas teknikas se topan. İ mas kualo keremos...
