Lejenda internasyonal, estrea del sinema, jazz i radio... kreatura de los Judios?
De un punto de vista, si. Louis Armstrong, tambien konosido komo “Satchmo”, “El Embasador Satch”, fue adoptado, ma no ofisialmente, de la parte de una famiya de imigrantes Djudyos de Lituania que tenian un negosyo de transporto de vyejeria (hurda) en Luisiana.
Nasido en Nueva Orleans (New Orleans), Armstrong desho la eskola en la sinkena klasa para ganar parnasa para su famiya i empeso a lavorar komo empyegado de distribusyon/garson de buro (Office boy) en la botika de los Karnofskys. En primero empesaron a darle komidas de kaza kayentes en kada noche, despues le diyeron una kama para durmir. Tambien lo alimentaron de otras maneras: le emprestaron sinko dolares para que pudiera merkar su primera korneta (un modo de trompeta) i lo enkorajaron a kantar. En el koryente de su vida, Armstrong eskrivio sovre la amabilidad de los Karnofskys, de la ayuda ke le dyeron i la diskriminasyon ke vido esta famiya komo Djudyos.
Ma las difikultades del chiko Louis kontinuaron. Se metyo en bela kon la polisia por ser un “personaje peligroso i dubyozo” i finalmente fue arestado i mandado a la Kaza para Chikos en Color Waif. Esto tambiyen fue un regalo para el chiko Louis: en la Kaza le dyeron una edukasyon bastante de muzika. Armstrong, de tredje anyos, se izo el líder de la orkestra de la Kaza i kuando eskapo de kedarse en la Kaza empeso a dar konsiertos de jazz kon su orkestra.
Anyos i anyos, teniya un Magen David en la garganta para akodrarse de la buendad de sus benefaktores.
Manadero: Jewniverse 21 Septembre de 2016
