Antes un mez me fui kon mi ijo i mi ermuera a “KAŞ”, un lugar serka de Antalya, un kazal chikitiko, turistiko, lugar konosido por el pais entero, lugar maraviyozo, se puede dizir un kanton del paradiso, lugar kalmo, kayente, djusto para repozar i estar en un mundo differente leshos de los bruidos de las sivdades, de los problemes de kadal dia.
“Kaş” un kazal chiko ande se puede kaminar entre las kayes estrechas, multikolores, komer lo ke es en un restorante tipiko, bever una bevyenda delantre un panorama ekselente en kontemplando el echado del sol, un panorama ke la persona no se esta artando de ver, entrando a la mar limpida de kolor vedre i blu, lugar empresyonante…
8.000 personas en invyerno i el dopyo en enverano, ande se puede ir a todo modo de lugar en kaminando, a pye. Kaminar un dia entero kon vapor, entrar a la mar, komer, avlar i burlar kon los turistos es un privilejyo ke no se topa en dingun lugar. Durmir kon las luzes de la isla Meis ke se topan djusto en frente de Kaş, sintirse libero en kada paso, estar en relasyon kon personas buenas i diferentes i ke ayudan, kazal sivilizado…
“Anthipellos” la sivdad Antigua ke se topa en Kaş ande se puede ver la istorya de miles de anyos pasados. Los sarkofajes (lahit) de los Likyas, las rokas (kaya) i las tombas monumentales, i el Teatro Antiguo de 4.000 personas…
Los restos de paredes (sur kalıntıları) se pueden remarkar de la mar.
Kaminando a pye kaji 15 minutos mos puedemos ir a esta sivdad antigua.
La mar de kolor turkuaz un poko mas freska de lo ke uzamos.
La plaj “Ilıca” es karakteristika kon su arena blanka ke no ay en dingun lugar en la Turkiya. En mizmo tyempo es la sola plaj en muestro pais ande sale la agua kayente de aryento la mar. Kada kanton, kada “beach” (bodre de mar), ekstraordinaryo en los puntos de vista de la mar, del komer, de la limpyor, del servisyo i del komporto de las personas.
En suvyendo a un barko de 10-12 personas de “Limanağzı” (boka del porto), ir a 20 puntos a las plajes una mas ermoza de otra, pasar el dia entero en una de estas entornados de arvoles, kunandose i meldando livro kon kalmo, bevyendo kafe en las kosheyikas tipikas es un plazer ke no se puede dar a entender.
Se puede eskrivir muncho sovre KAŞ.
La filozofiya de azer vakansas kon repozo en Kaş, ke no tyene grandes klubes, diskos, fraguas tapando el syelo, la fason del komporto de los moradores i lavorantes, el kibarlık de vender mizmo suvenires por 10 liras, no egziste en otros kazales.
Pasimos 4 dias komo un esfuenyo (rüya gibi) i lo mas emportante para mi fue ke me lo gozi de mi ijo i mi ermuera ke son veramente muy kerensyozos.
