Puedeser oyitesh, la popular tradescantia (telegraf çiçeği, spiderwort en ingles, tradescantie en fransez) es una planta de kaza konvenivle i fleksivle: se puede plantar en la tyerra o meter en un saksi, i es muy pasensyoza kon la djente olvidozos, olvidozos de arrozar. Su nombre mos traye al tino Moshe i los djudyos en el dizyerto de Sinay, deambulando durante 40 anyos. Ma no se save reelmente porke se le dyo este nombre a esta planta de kolor maraviyoza.
Ma el nombre de la planta en realidad se refiere a una lejenda mas resiente i funesto de un djudyo ke se burlo de Jesus en indose a la krusifikasyon. La istorya no es en realidad kanonika (istoryas santas de la eglisya): las versiones mas antiguas aparesyeron en el siglo XIII i fueron popularizadas en el siglo XVII por un panfletista yamado Ahashver. (Kuryozamente, este nombre viyene de Ahashverosh, el rey de Persia de la istorya de Purim).
Este motivo del djudyo errante tambien salyo en la forma de un romanso fransez en 1844, opera i filmo mudo (sessiz), ke no eran antisemitas ma bastante deprimentes: un djudyo es separado de su ermana en el Estrecho de Bering i kondenado a viajar sin fin sovre todo el mundo. Verso la fin de la istorya, empesa una epidemia de kolera, (si pensas meldar el livro o ver el filmo areta de meldar aki!) i nunka va poder enkontrar su ermana. Erensya bastante pesgado para una planta tan ermoza de saksi…
