Una pyedrita: El uniko direktor de filmo israelyano ke gano un Oscar muryo diya de viernes, el 3 de Augusto; teniya 86 anyos
Moshe Mizrahi fue el primer i uniko sineasto de Israel a ganar un Premyo de la Akademia Oscar en la kategoriya “Mijor Filmo en Lingua Estranjera”, kon ‘Madame Rosa’. Este filmo fue presentado por la Fransia.
Nasido en Ejipto en 1931, Mizrahi izo aliyah kon su famiya a Israel en 1946. En 1959, se enstalo en la Fransia para desvelopar su karyera sinematografika.
Despues de dirijir unos kuantos filmos en Fransia, Mizrahi torno a Israel en el empesijo de los anyos 1970. En 1972 dirijo “I Love You Rosa” - “Te Amo Rosa”, su primer filmo nominado al Premyo de la Akademia Oscar en la kategoriya “Mijor Filmo en Lingua Estranjera”.
Dos otros de los filmos de Mizrahi - “The House on Chelouche Street”- “La kaza en la Avenida Chelouche” (en 1973) i “Madame Rosa” fueron tambien nominados para el Premyo de la Akademia por la “Mijor Pelíkula en Lengua Estranjera”, i Madame Rosa gano el premyo en 1977.
Kon este premyo Mizrahi se izo el primer i uniko direktor israeli ke gano un Oscar, malgrado ke este filmo reprezento la Fransia.
Mizrahi kontinuo a dirijir una seriya de otros filmos i en 2001 fue nominado kon un premyo de reushita a vida de la Akademia de Sinema i Television de Israel.
La muerte de Mizrahi, fue anunsiado por el Ospital Ichilov en Tel Aviv. Le sobreviven sus dos ijos i su mujer Michal Bat-Adam, una aktrisa i sineasta israeli.
Sus funerayes se realizaron el Lunes, 6 Augosto, 2018.
