Del empesijo del syeten mez, fina la fin del ochen mez, en enterval de ocho semanas; kaji sesenta kriyaturas de sesh anyos, fina tredje anyos fueron los partisipantes de la koloniya este enverano.
Ijikas, ijikos, los madrihes, el personel del mupak, personel de limpyeza, la direktrisa, los profesores, una ekipa de setenta personas izyeron un esforso muy grande para ke los ke vinyeron aki, tengan unas vakansas ke no se van a olvidar nunka.
Kada dia una program diferente para edukar, divertir (eğlendirmek) i pasar el tyempo kon entuzyasmo (coşku). Vos kero dar a entender el program de un dia por egzempyo.
Todos a las ocho de la demanyana azen el dezayuno endjuntos. Despues es la ora de azer sus lesones ke los profesores les dyeron para las vakansas.
Si es difisil; los madrihes les ayudan kon grande pasensya.
Kuando terminaron, es la ora de una aktivitad; komo ambezarsen a azer estatuas diferentes, formar djoyas, azer pinturas, ambezar en ingles, azer teatro, leson de muzika i munchas otras kozas.
A la fin entran a la pisina, djugan, koryen, kaminan kon bisiklet, se van a azer el torno de la isla kon faytones, se van a la mar, tyenen ora fiksa de komer midi…
Despues de midi djugan basketbol, futbol; las ijikas djugan kartas i kozas diferentes.
La Koloniya es un kampo de enverano kon todo djusto. Dos vezes a la semana las kriyaturas se van a la Mahazeke-Tora para ambezarsen el ebreo i la kultura jeneral.
Es un guste de ver noche de Shabat todos kantando las kantikas de Shabat en gritando, kon boz alta.
Es una alegria para mozotros de ver la manseves entre mozotros.
Kada semana los alhades Niso Maçoro aze nochadas de filmos los mas muevos ke no estan djugando ainda en los sinemas. Filmos muy enteresantes de los festivales, ke kon este evenemento esta dando un grande apoyo (destek) a los gastes de esta organizasyon.
Siguramente ke la responsabilidad la mas grande esta en los ombros de la direktrisa, Ventura Gönceer. Okuparse de todas las kriyaturas; el uno se kaye, la otra se peleya, el otro se ensela, la otra se hazineya…
Veramente no es fasil de dirijar aki, mizmo ke ay volontaryas i volontaryos ke dan sus almas para una enveranada reushida.
La ultima semana, noche de Shabat uvo kuarenta personas, todos kon sus famiyas ke komyeron aki kon el Grande Rabino i su famiya.
Todos muy alegres, avlando, komyendo i kantando las kantikas de Shabat.
Fue un final alavado i alhad demanyana todas las madres, padres vinyeron a tomar sus kriyaturas ke ya se eskarinyaron.
Este anyo fue muy reushido kon el presidente Moris Kohen i la presidente de las mujeres Sandra Yurgaf i un ekipo muevo kon una vizyon diferente de kada anyo.
El Dyo ke mos ayege para kada anyo mijorado…
