Un anyo muevo, Rosh-Hashana es un prinsipyo (başlangıç) ke kontyene todo modo de evenementos, mos da la kuryozidad, la emosyon, para ser pozitivos i realistos por el anyo vinidero. Rosh-Ashana orijinalamente es la perioda kuando las personas deven de echar ojo a los yerros, a las kulpas ke izyeron entre el anyo i deven de ekskuzarsen delantre del Todo Poderozo… Azer Teshuva es importante sovre todo en el punto de vista de tornarse verso el Dyo.
Rosh-Ashana es el empesijo del invyerno, es una de las fyestas las mas alegres ande djuzgamos el anyo ke paso i fyestamos la kreasyon del mundo kon dezeos (dilek) pozitivos ke oguramos de aryento del korason. Asigun la kreensya djudiya Rosh-Ashana es el diya de djuzgo (yargı günü). El Dyo desida el destino de todos por el anyo vinidero en Rosh-Ashana. En esta fyesta sakra, tres livros se avren delantre el Todo Poderozo. El primer por las personas onestas i djustas, el segundo por los ke kontinuan a pekar i el treser para los ke estan entre los dos, los de en medyo.
Las personas onestas i djustas se eskriven immediatamente al “Livro de la Vida”. Los ke se aleshan del kamino derecho se eskriven al “Livro de la Muerte”. Por los d’en medyo la desizyon se remete (ertelenir) fina el dia de Kipur.
Rosh-Ashana es el dia de la kreasyon del umano i el dia ke se kompleto la fondasyon del mundo. En este diya, los djudyos kon la boz del Shofar anonsan al mundo entero ke el Todo Poderozo es el Rey del mundo.
Kuando los djudyos akseptaron la Tora en el monte de Sinay se oyo la boz del shofar. En tanyendo el shofar (şofarı çaldığımız zaman) mos estamos akodrando ke akseptimos la Tora i ke semos ovligados de ovedeser los dyes komandamyentos.
La boz del shofar mos aze akodrar el destruimyento del Bet Amikdash. Mos enspiramos de orasyonar para la rekonstruksyon del Bet Amikdash kuando oyemos el shofar.
La boz del shofar mos aze akodrar komo se sakrifiko Yitshak. Akel tyempo Yitshak estava pronto a sakrifikarse por el Dyo. En tanyendo el shofar estamos deklarando (ilan etmek) ke estamos prontos a sakrifikar muestra vida tambyen.
La boz del shofar mos aze akodrar ke todos los djudyos de la diaspora se van a aunar un dia i akel tyempo vamos a tener un grande eskarinyo para ver esto.
Kuando vinimos a kaza despues de la sinagoga azemos un Kidush i dizimos la Beraha de “Sheeheyanu”. Despues ke se lava las manos se aze Amotsi kon dos panes enteros i el amotsi se unta no a la sal ma a la asukar.
Para tener un anyo dulse se mete a la meza dulse de mansana, para ke muestros enimigos se despareskan, se mete prasa, para ke se aleshen, la espinaka, kuando el Dyo Baruhu mos djuzga ke mos konsidere solo las mitzvas, se mete la kalavasa, para la azlaha, el peshkado i para ke syempre seygamos el kapo de muestra famiya komemos la kavesa del peshkado u la kavesa del kodrero.
El primer dia de Rosh-Ashana despues de midi se aze una orasyon “Tashlih” ke es emportante. Delantre de una agua koryente vazyamos muestras aldikeras i mos sakudimos (silkelenmek). Esto es el sembol ke azemos teshuva senseramente i mos liberamos de muestros pekados. Esperamos i orasyonamos ke el Dyo kon su buendad sin fin mos va pardonar i muestros pekados se van a undir en la profundidad (derinlik) de la mar.
Las fyestas son alegres porke toda la famiya se auna en el dorredor de una meza, todos avlan endjuntos, komen, beven i pasan el tyempo kon karinyo. Los mansevos estan lavorando duro, sin tener oras fiksas i la famiya entera se esta puedyendo arrekojer solamente en las fyestas.
El Dyo ke mos ayege para kada anyo mijorado sin sar i sin mal, todos sanos i rezyos, pujados i no amingudos, kon reushidad, echos buenos i parnasa tova. Amen!
