La istoria de los djudios en Chipre es sorprendientemente sin munchos problemas malgrado la serkura de la isla a la Evropa i a la Tyerra Santa.
La tresera mas grande isla en el Mediterraneo, Chipre fue el lugar de una importante komunidad djudia durante la epoka romana, i unas kuantas sinagogas se fraguaron en la isla. Ma, en 117 C.E., los djudios chipriotas partisiparon en un revolta kontra los romanos, i, en repuesta, los romanos arrondjaron a los djudios de la isla i los defendieron de tornar. La prohibisyon no fue bien aplikada, i la komunidad torno atraz i prospero sin mayor aktos de antisemitizmo kontra eya.
Durante la Edad Medya se toparon rejistros de komunidades djudias en Famagusta, Nicosia i Paphos. Ma, despues de que Chipre troko de mano i se izo parte del Imperio Otomano en el siglo XVI, la komunidad se amenguo i kaji se desperasyo. La prezensia djudia rejistrada no salyo en medyo asta ke la isla estuvo basho la administrasyon ingleza (1878).
En 1883, un grande grupo de djudios rusos fondaron un kazaliko en Orides serka de Paphos. Dos anyos despues, 27 romanos arivaron a Chipre kon la entisyon de fondar un kazaliko, ma no pudyeron reushir. En 1897 se aprovo una otra koloniya, kon el apoyo de la Asosiyasyon Kolonial Djudia i Ahavat Zion de Londres en los doredores de Margo, Kouklia i Cholmakchi. Arrivaron mas de dos dozenas de djudios de Romania i sus famiyas, ma, komo las otras vezes de antes, estas kolonias no estavan aparejados adekuadamente para el lavoro de la tyerra.
La relasyon mas importante de Chipre kon la istorya djudia es el rolo ke djugo la isla en la istorya de la kreasyon de Israel. Los inglezes vyeron a Chipre komo la solusyon perfekta para la imigrasyon djudia “ilegal”. A menos de 300 miles del bodre israeli, una parte de Chipre se konvertiyo de la parte de los inglezes en un grande sentro de detansyon para diezes de miles de djudios ke fuiyan de la Evropa okupada por los Nazis i ke ke fueron defendidos de yegar a la Tierra de Israel. Ironikamente, unos kuantos syenes de djudios ke arivaron a Chipre en el empesijo de la dekada de 1930 fueron mandados a Israel i Afrika en el anyo 1941, antes ke se krearan los kampos en Chipre.
En 1951, aviya un poko mas de 200 djudios en la isla. Este chifro kontinuo a abashar fin a una data serkana. Serka de la dekada 1990, la populasyon djudiya empeso a pujar achakes de las relokasyones profesyonales i oportunidades de komersyo. Esto fue la razon de la fondasyon de una kaza de Habad i una sinagoga.
Manadero: NJOP 16 de agosto de 2017.
