Nesim Güveniş/Israel
Serka de las fiestas Yamim Noraim, me akodro siempre de mi chikes.
Yo nasi en Balat onde avia una grande komunidad de Djudios i bivi aya asta la edad de Bar-Mitsva. Para mi, Balat era un mundo aparte kon sus sinagogas Ahrida, Yanbol, Chana, Salonik, Istipol, Kasturiya i la “Hevra” ke era un klubo onde djugavamos ping-pong, aziamos jimnastik i me gustava sintir a Dr. Jak Kurtaran z”l, ke dirijava los kursos de kultura.
En las fiestas, todas las sinagogas eran yenas de djente i sovre todo, diya de Kipur, munchos vinian kon siyas ke eyos yevavan a la rovez ensima sus kavesas para pueder asentarsen en la guerta del Kal Ahrida. En esta sinagoga, se avrian todas las ventanas para ke los ke se asentan en la guerta puedan segir las orasyones. Me akodro ke, mas ke orasyonar, los de la guerta azian ‘muabet’ entre eyos i empesavan a gritar solo en los Piyutim porke les gustava la melodía.
Atrás unos kuantos anyos, kije pasar las fiestas en Estambol. Diya de Kipur, mos fuimos kon mi ermaniko al Kal de Ahrida i mos asentimos en los mismos lugares onde uzavamos asentarmos kon mi padre, z”l. Fue para mi grande emosyon de rebivir los mismos sentimientos de mas de 70 anyos atrás.
En la lektura de la Tora, después de unos kuantos yehidim, el hazan yamo “Yaale ve yavo Nisim Eskenazi”. Kayades!… Dinguno no se alevanto. Mi ermaniko me dize kon boz flaka: “Niso, me parese ke es a ti ke te esta yamando.” Kuando miri en la direksyon de la teva, vide ke el hazan me esta azyendo kon su dedo un sinyo de “ven, ven!” Kuando suvi a la teva, antes de empesar a meldar, el hazan me dize: “Pardon, algún yerro ize? Vide ke estavas ezitando.” “No,” le respondi yo. “no izites yerro. Solo, ay mas de 70 anyos ke dengunos no me yaman Nisim Eskenazi”.
Komo savesh, en 1934, entre las reformas de Atatürk, salyo una ley ovligando todos los Turkos a tomar una alkunya, koza ke no egzistiya asta akeya data. El muhtar de muestro barrio ovligo mi padre a tomar la alkunya turka, Güveniş, malgrado ke ya teníamos muestra alkunya.
Komo no enkantarse de ver, ke mismo después de mas de 70 anyos, aviya ainda en Balat djente ke konosian mi famiya kon muestro nombre orijinal!
