Esta semana resivi de Israel un livro intitulado, OFISYOS i sinyado, Asher AMADO. No es la primera vez ke resivo un lavoro del Sr. AMADO. Si no me yerro, el primer era sovre la Sivdad de EDIRNE i, el sigundo es sovre los ofisyos. Asigun mi, es mas ke un simple livro. Es komo un ANSIKLOPEDI KON LAS FOTOGRAFIYAS DE KADA OFISYO. Aki kero relatar una partida del PREFASYO, ande el Sr. AMADO ya lo esta dando a entender muncho mijor de lo ke va adjustar yo. Mis komplimentos… El dize:
Kada demanyana kuando amanese el sol, me alevanto kon alegria, me lavo, me visto bien i despues de bever el kave de la manyana, salgo a la kaye para irme a mi lavoro de kada diya. Ke lavoro? Despues vos kontare. En mientres vos digo ke en las kayes siempre topo djente ke ya salieron de sus kazas, antes ke saliera yo. Es kuryozo no? Ande se van esta toda djente? Miro en las karas i trato de endevinar kualo es el ofisyo de kada uno, ma esto es imposivle. Ay munchos varios ofisyos i no savemos komo fue ke tala persona o otra, eskojio tal ofisyo, akel lavoro. De toda manera, espero ke todos salen al lavor kon veluntad, para traer buena parnasa a sus famiyas. Oy, munchos ofisyos, muevos en el mundo, komo por egzempyo, injenieres de komputaderas i telefones selulares. De la otra parte, ay ofisyos ke ya pasaron del mundo i ke no egzisten mas. En las kayes ya no aparese mas el vendedor de petrolio, porke mas ya no uzamos. En muestra chikes en muestra sivdad aviya munchos ofisyos: chadirdji, enkalador, lavorador de tyerra, karpentero, chapelyero, gazetero, panedero, nani, komadre, shastre, sedakero, rabino, kantador, zarzavatchi, garson… Ma espero ke vos va interesar, keridos ninyos a konoser unos kuantos de los ofisyos ke eran nesesarios en las jenerasyones pasadas, i saver tambien algo por los ofisios modernos. No me olvidi de dizirvos: mi ofisyo es enjenier. Kual lavoro dezeash tomar vozotros por ofisio?...
KERO RENGRASIAR A YEHUDA HATSVI, A Dr. GAD NASSI, DE BINDICHA MEMORIA, I A HILEL TZEHANVIRT KE ME AKOMPANYARON KON PASENSYA DURANTE KADA PASO EN EL PROSESO DE LA REDAKSYON I LA EDISYON DE ESTA OVRA. I A LA AUTORIDAD NASIONALA DEL LADINO POR EL AYUDO.
