Henryk era muy chiko en el anyo 1945 kuando la Gerra eskapo i ke los sovrebivientes empesaron a tornar. EL padre de Henryk, Joseph Foxman, lo aviya dado a su dada para ke lo mire, i la mujer lo aviya tomado kon muncha kerensya porke lo keriya muncho bien.
La dada de Henryk no penso ni por un momento ke el padre de Henryk iva sovrebivir despues de la destruksion del ghetto de Vilna. A Joseph Foxman, lo aviyan transferado a Auschwitz, i todos saviyan ke dingun judio no iva pueder tornar de aya.
La dada, despues ke adopto a la kreatura, lo baptizo en la Iglesia Katolika, i lo estuvo embiyando a la iglesia para ke se ambeze el kateshizmo.
Kuando Joseph Foxman torno de Aushwitz, era el dia de Simha Tora. Joseph vino a tomar a su ijo. La desepsionada (hayal kırıklığına uğramış) dada empeso a meter las vistimyetas de Henrick en la validja. Entremientes le disho a Joseph Foxman ke aviyan konvertido la kreatura al kristianizmo i ke Henrick se aviya echo un buen katoliko. Por esto, eya metyo el livro de kateshizmo en le validja.
Joseph Foxman tomo la mano de su ijo, i empeso a yevarlo direktamente a la Grande Sinagoga de Vilna. En el kamino, le disho ke el era judio i ke su nombre era Avraham.
En indosen a la Sinagoga, pasaron delantre de la iglesia, i la kreatura kijo entrar aryento. Esto le izo grande pena al padre. En este momento, un papaz salyo a la puerta, i kuando Henryk le tomo la mano para bezarla, el papaz le disho ke no se olvide ke el es katoliko.
Joseph keriya aleshar a su ijo del papaz i de la iglesia. Ma, ya saviya ke no es djusto. Estas personas aviyan engrandesido a su ijo, i ansi le aviyan salvado la vida. Kaliya ke amostre a su ijo el judaizmo, el judaizmo vivante, i de esta manera, su ijo se iva olvidar, i iva abandonar todas estas kreensias etranjeras.
Entraron en la Grande Sinagoga de Vilna. Aya, rankontraron algunos sovrebivientes judios de Auschwitz ke aviyan tornado a Vilna, i agora estavan rekonstruyendo sus vidas i sus espiritus judios. En medio de la kruda realidad de sus sufrimientos i de sus terrivles perdidas, los sovrebiventes estavan kantando i baylando kon alegriya, i ansi selebrando la fiesta Simha Tora.
Avraham miro kon los ojos avyertos a su rededor, i tomo un livro de orasyones. Estava kontente de estar aya kon su padre ke apenas lo konosyo. Sigiendo los movimientos de los ombres i imitandolos, la kreatura empeso a baylar.
Un soldado judio ke vistiya una uniforme sovyetika, no estava puediendo aleshar sus ojos de la kreatura. El soldado se aserko de Joseph, i le demando: “Este ijiko es judio?… Esta es la primera biva kreatura judia ke rankontri en estos kuatro anyos”.
El padre le respondio ke la kreatura era judia, i lo prezente a su ijo. El soldado teniya lagrimas en los ojos. “Keres baylar kon mi? Te va tomar enriva mis ombros?” le demando al chiko.
El padre meneyo la kavesa, i el soldado lo tomo al chiko enriva de los ombros. Kon lagrimas en los ojos i el korason yeno de alegriya, el soldado empeso a baylar kon el chiko. “Este es mi rulo de la Tora” disho el soldado.
Abe Foxman (Abraham Foxman), el direktor nasyonal de la Liga Anti-Difamasion (Antisemitizmle Mücadele Komisyonu), se akodra de este dia ke tuvo su primer sentimiento de ser judio.
