Dimos la espalda a la sezon de enverano. Mos tornamos a la vida kultural i arte - la vitamina para gozar del Otonyo.
ISTANBUL DEVLET OPERA VE BALESİ (İDOB) avrio la sezon el 28 septembre, 2018, (Kadıköy Süreyya Operası):
El shefe ZDRAVKO LAZAROV, por la opera de avyertura, onoro ROSSINI por sus 150 anyos. En el program va tomar parte las aryas de las ovras konosidas del kompozitor:
Il Turco in Italia; II Maometo (Mehmed); Il Barbieri di Siviglia; La Cenerentola (Cinderella/Külkedisi)
İDOB desido el tema, IDEALISMO - para azer enkontrar los amantes de arte, los spektatores kon el opera:
“DON KIŞOT”, un idealisto reputado – El Opera Don Quichotte de J. Massenet va tener su “première” en Turkiya el 19 de Enero, 2018. Una “premiere en Turkiya”. Recep Ayyılmaz (rejisor).
Las Ekspsozision de Fotografias:
1 - Notre Dame de Sion:
“Fleuves Frontières “ (Sınır Aşan Nehirler) (l’eau en Partage).
FRANK VOGEL (Fotojurnalisto)
27 Septembre - 24 Novembre.
Entrada libre de lunes a shabat, de 11.00 a 18.00.
Kon el patronaje de Monsieur Bertrand Bushwalter, Konsul Jeneral de Fransia.
Yann de LANSALUT, direktor.
Suzan SEVGİ, Direktris adjointe.
2 - Galata Rum Okulu:
ANİ AREVYAN. La diferensia entre mirar i ver (Bakmakla görmek).
Una artista reputada ke ekspozo sus fotos travadas kon grande maestria - mas de 30 anyos de lavoro perfekto i 10 miles de karés diapozitivos.
3 - Leica Galeria Bomontiada (vieja Fabrika de Bira):
HORST P. HORST. Moda i Portretos.
Por la primera vez en Estambol.
El fotografo de Vogue, USA
4 - ARA GÜLER MÜZESİ, Bomontiada:
Inkreivle de konstatar ke la Fabrika de Bira (una guerta), ande mos ivamos kon los parientes, se izo tan dinamiko i popular, un sentro komunitario para enkontrar sovretodo el Muzeo de ARA GÜLER, artisto-fotografo grande, reputado i amado en Turkiya. Deskuvri otruna vez su mundo fantastiko.
La entrada del Muzeo ARA GULER se topa al etaje inferior del restorante Kilimanjaro.
Keridos Lektores, ay muncho de ver i mirar. Un konsejo para los amantes de arte:
Sin peryer tiempo, profita del otonyo para vijitar las ekspozisiones, teatros, konsiertos, festivales en Estambol.
“Muestra vida es un viaje kontinual, del nasimiento a la muerte. Se troka el peyzaje, se trokan las personas, las nesesidades se transforman, ma el treno va adelantre. La vida es EL TRENO i no LA ESTASION.
PAOLO COELHO”
