Anyos i anyos, la palavra Polaroid fue sinonimo de la fotografia ship-shak (instant-photo) (fotos ke miravamos un punto despues de travarla), en una epoka ke normalmente deviyemos de kitar el filmo de la makina de foto i yevarlo a un fotografo para developarlo en foto.
El Dr. Edwin Land, uno de los ko-fundadores del Polaroid Corporation, nasyo en el 7 de Mayo de 1909 en Bridgeport, Connecticut. Era ijo de Martha (née Goldfaden) i Harry Land, imigrantes djudios de la Europa del Este. Land empeso a estudiar kimika en la Universidad de Harvard en 1927, ma desho la eskola despues de su primer anyo para lavorar enriva de sus propios eksperimentos syentifikos. En Nueva York, paso sus dias en la Biblioteka Publika i sus noches emprestandose un laboratorio de la Universidad de Columbia. Este mizmo anyo, invento el primer filtro polarizador. Torno a Harvard por tres anyos, ma de muevo desho los estudios i avriyo los Laboratorios Land-Wheelright. En 1937, metyeron el nombre Polaroid Corporation a la kompanyia. La teknolojiya de polarizasyon de Land se utilizo en munchas enventos, inkluzo antojos de vision nokturna, antojos 3-D, ekranes de kristal líkido (LCD) i afilu en los aviones de espionaj U-2 ke fueron utilizados por los aliados durante la Segunda Guerra Mundial.
En el 21 de Febrero de 1947, Land prezento al mundo la primera kamera instantaneya. La kamera de Land se komersiyalizo i se empeso a vender dos anyos despues. En el empesijo de los anyos 70, la teoria de la vizyon en kolor de retinex, un muevo invento del Dr. Land, permityo a Polaroid a desvelopar la kamera de kolor instantaneya SX-70. En el 27 de Julyo de 1982, Land demisyono del posto de presidente de Polaroid, despues del dezastro finansiyero de Polavision ke era la mueva sistema de filmo instantaneya de Polaroid.
Land era un siantifiko en primero, i prezidente de la kompaniya segundo. Aunke Land es konosido komo el kreador de la kamera Polaroid, en realidad teniya mas de 500 patentes. El Dr. Edwin Land muryo en el 1 de Marso de 1991. “The Polaroid Corporation” fayito en el 11 de Oktubre de 2001.
