La semana pasada mi amiga Dalia Maya me telefono kon una boz muy emosionada i me disho ke renkontro una istorya muy interesante en lo ke estava en İzmir. Enkontro a una sinyora, Sıdıka Ümeyme Üge, de 93 anyos kon kara sonriyente i muy simpatika. Se akodra de munchas kozas de su chikez i de su vida kon su famiya i amigos de chikez. Le konto a Dalia sovre su abuela Selanikliya ke teniya alkunya de Kuzucuzade, su abuelo ke era el dalkavo ministro de echos estranjeros del Imperio Otomano, su padre, Kudret Üge, ke era el kapo doktor operator del ospital de Uşak. La sinyora, muy diferente de las mujeres de su tiempo, se suviya a kavayo, a bisikleta, nadava i korriya. Una mujer illuminante. Ma lo mas interesante de todo es ke akodrava de su amiga intima de su chikez, la ija de sus vizinos, Dina Kohen. Dina era la ija de Marko Kohen, direktor de la banka Osmanlı de Uşak. Las ijikas estudiaron la eskola primarya endjuntas. Ma despues, la vida, las sirkunstansyas las separo a estas amigas ke partajaron mas muncho ke estudios. En Uşak, se selebravan las fiestas djuntos, las famiyas se frekuentavan, komiyan i beviyan endjuntos. En estos dalkavos anyos, la Sra. Ümeyme se akodra mas frekuentemente de Dina i kere saver si dainda bive, ande esta, si tiene ijos, inyetos... Empeso a bushkarla ama asta agora no tuvo haber de su amiga Dina kon ojos blus. Agora estamos todos bushkando a Dina Kohen, ija de Marko Kohen, direktor de la banka Osmanlı de Uşak. Estamos bushkando los konosidos o paryentes de Dina. La Sra. Ümeye kere konektar kon Dina o alguna de su famiya. En la foto vesh a las ijikas endjuntos en el anyo 1937. Si ay alguno ke tiene haber de Dina, ke mos eskriva i asi azeremos oroza a una sinyora ke bushka la amiga de su chikez.
