Es verdad. Siempre ke esto kon grupos de mi puevlo, tengo ganas de riyir todo el tiempo! Deke la piesa KULA ‘930 tuvo tanto sukseso en los dalkavos 40 anyos? Es porke kada uno topa un poko de si mizmo en los karakteres de la piesa. I kuando mos topamos en los tures organizados por Mordo Hazak i Cako Uyar, (BizBize Tur) kon un monton de djudios, ayi vemos estos mizmos karakteres!
Este fin de semana, profitando de la okazyon ke era fiesta de la Republika Turka, mos fuimos a las Montanyas Ida (Kaz Dağları) kon un grupo de 90 personas (mashalla!). Dos otobuses yenos. Fue un tur muy resuhido en primero porke Mordo, Cako i sus keridas mujeres estuvyeron korriendo para responder a todas las demandas de las personas i en sigundo porke el tiempo mos reusho. Todo fue bien organizado mirando al mas chiko detalyo. I todos mos despartimos kon un sintimyento ke keremos vermos de muevo en otros tures.
Lo ke mas me vino komik fue estas ganas ke tienen muestras mujeres de azer “shopping” en kada lugar ke se van. Atyo, ay esharpas? A kuanto? 10 liras? Okazyon vallayi, merkaremos unas kuantas! Na, esta mujer esta vendiendo menta. Okazyon. Ayde kale merkar (komo ke si no ay menta en Estambol!) Vini ijikas, este esta vendiendo krema para las dolores! 15 liras. Atyo, a todos les esta ergueliendo un lugar (los brasos, las pachas, los dizes, el bel...) i siguro ke kale merkar de esta krema. Al ombre le salyo pyango! Despues mos fuimos a un muzeo i ayi estavan vendiendo krema “de leche de aznos”! I ke aze esta krema? Oooo, es una koza a las mil maraviyas! Es para fregar a la kara i en supito te azes manseva! Todas las mujeres siguro korrieron para merkar esta krema. Al dia, todas tenian las karas briyando. Disheron ke Kleopatra se aziya banyos de leche de aznos. I mozotras ke manko tenemos de Kleopatra? Los vendedores en el muzeo estavan baylando chiftetelli kuando eskapimos las kompras. I siguro ke no kale olvidar la azete de oliva i las azitunas. Estas montanyas yenas de oliveros i la rejyon famoza por su azete de oliva i azitunas. Atyo, grande penseryo mos tomo a las mujeres. De ande se va merkar la azete i las azitunas? Mos disheron ke en tornando ay un lugar espesial para merkar esto i ya mos se arepozo la alma! La torna fue muy difisil porke aviya muncho trafik. Ya kedimos 2 oras de rotar, ya estamos muertos kansados, todos kon un ojo bote i el otro almodrote ma dingunos no disheron, “ya basta, no se kere merkado azete i azitunas”! No, por sedaka! Dimos una media ora de mola en este magazen i lo enrikesimos al lugar i a todas mozotras mos se arepozo la alma ke ya merkimos kilos i kilos de azete de olivas i tambien azitunas! El Dyo ke mos ayege a ir a otros tures ande vamos a topar munchas kozas ke no se topan en Estambol, para merkar! Amen.
