Despues del immenso sukseso ke tuvo la piesa muzikal este anyo en Estambol (2500 personas lo vieron), el grupo de 50 aktores i muzisyenes kon 16 kreaturas (4 de Estambol i 12 de Israel, todos preparados por Izzet Bana) fueron invitados por la Itahdut Yotsei Turkiya (Türkiyeliler Birliği) para djugar la piesa otras 3 vezes en Israel.
El grupo yego a Israel el 1 de Novembre i se fueron direktamente a la sala de teatro a meter el dekor, konoser la shena i azer provas. Kansados bolados, akeya noche aktuaron por primera vez i tuvieron un sukseso immenso. La asistensya ke estava yena de nostaljiya por los lugares ke konosiyan de sus chikez salieron lokos. Aviya djente ke estavan yorando, riyendo, aplodisando, kantando todo el tiempo. La sigunda aktuasion fue el 3 de Novembre i la tresera el 4. El prezidente de komunidad djudia de Turkiya, Ishak Ibrahimzade i el hahambashi Rav Isak Haleva mos onoraron kon sus prezensias en viniendo ekspresamenta para apoyarmos.
Aki se deven de felisitar Oktay Gülerşen, presidente de la Itahdut i Jojo i Momo Eskenazi Gözcü por tener el koraje de realizar este suenyo ke tenian. Esto mostra ke nada puede estar kontra de la voluntad. Esto era un proyekto jigantesko i la voluntad de estas tres personas kon el apoyo de munchos en las dos komunidades lo realizo. El proyekto tenia por mision de azer la mitsva de dar la posibilidad de estudios a mansevos i tenemos la grande felisidad de aver kumplirla.
No se si vamos a pueder djugar la piesa una otra vez ama vos puedo dizir ke aver djugado en la ovra durante 40 anyos es una de las kozas inolvidavles en todas muestras vidas.
