Antes kinze dias desidimos kon una amiga de konoser Estambol, los lugares ande moravan muestros padres komo “Balat”, “Fener”, ets. Bushkimos un tur kon un gia (rehber) para ke mos de a entender i ya topimos.
Alhad demanyana el randevu era en un kafe delantre del “Muzeo Kariye” kon un grupo de 15 personas kon una gia i a las dyes djusto entrimos a este muzeo fantastiko. Es un lugar ke se ve simple de afuera ma kuando se entra aryento los mozaikes tantos ermozos ke la persona puede salir loka.
“Kariye” vino de la palavra “Khora” ke kere dizir en el grego antiguo “afuera de la sivdad” (şehir dışı). Los mozikes i los freskes son egzempyos del siglo 14 de la pintura de los Romanos.
“Kariye” despues de la konkuista (fetih) de “Estambol” en 1453, en el tyempo de Fatih Sultan Mehmet se utilizo komo eglisya. En el anyo 1511, se transformo en una meshkita. En el anyo 1945 se transformo en un muzeo.
Entre los anyos 1948-1958 el “Instituto Amerikano Bizantino” despues de lavoros largos, kitaron en medyo los mozaikes i los freskos ke estavan serrados.
El dekor del tavan yeno de mozaikes dando a entender la vida de “Hristos” kon su madre “Maria” (İsa ve Meryem) kon munchos detalyos. El mozaik el mas enteresante es un andjelo ke esta transportando en su espalda un grande karakol (salyangoz) ke es el simbolo del paradiso.
A la fin de la vijita del museo mos fuimos a pye fina Balat.
“Balat” es un byervo ke vino de “Palation” ke kijo dizir en grego antiguo “Puerta del Palasyo”. Mas despues Balat se izo el nombre de un lugar.
Las kalejas vyejas estrechas, las kazas multikolores kon balkones, es un lugar kozmopolit ke adjunta las meskitas, las eglisyas, i las sinagogas kon las relijyones i las kulturas diferentes.
Kuando los djudyos fueron ekspulsados de la Espanya antes 500 anyos, vinyeron a Estambol i empesaron a morar en Balat, Hasköy i otros lugares.
En estas kayes puedemos ver los lavados enkolgados de una kaza a la den frente kon kuedras, los chikos djugando top, los gatos en los magazenes, ets.
El simbolo de Balat es “La Kolina kon Eskaleras”. En primero kale vijitar el “Fener Patrikhanesi” ke despues de la konkuista de Estambol en 1453, todos los ortodokses del mundo akseptaron el patrik de Fener.
La struktura la mas grandiosa es la del liseo de los ijos gregos. Para konstruir este edifisyo, trusheron de la Fransya pyedras koroladas i por esto es nomada komo la “Eskola Kolorada”.
La eglisya “Sveti Stefan” es nomada entre el puevlo la eglisya de fyerro. Para konstruir esta eglisya empleyaron 500 tonas de fyerro.
En “Fener” el lugar el mas emportante es la eglisya “Aya Yorgi”, ke es echa de oro.
“Fener” era la maalle de los kristyanos.
“Balat” era la maalle de los djudyos.
“Cibali” era la maalle de los musulmanos.
Todos biviyan en el entorno komo ermanos i kon pas.
La ovra la mas istorika en Balat es la sinagoga “Ahrida”. Despues de la fondasyon de Israel en 1948, munchos djudyos de Balat izyeron aliya a Israel. Muestro torno se termino en Ortaköy mizmo ke estavamos kansadas, kijimos vijitar la egzibisyon ke tuvo lugar en Ortaköy “Hüsrev Kethuda Hamamı”.
El nombre era “Refleksyones Milagrosas” (Mucizevi Yansımalar).
En esta egzibisyon aviya ovras de 52 artistos komo Habip Gerez, Eti Koen, Henri Kandiyoti, Şeyla Gülman Niyego, Vivi Menase i otros konosidos.
Felisitasyones a todos por sus kapachitades i sus ovras fantastikas.
Las dos ovras de “Şeyla Niyego” eran koza de ver. Un panorama de “Central Park” en “New York” kon las kolores del otonyo desinado kon una atansyon delikada. Las luzes de los edifisyos refletandosen (yansımak) en la agua, las solombras de las personas, los tones de las kolores vedre i blu. Todo en su lugar. Kero felisitar keridos lektores, “Şeyla Niyego” i sus kolaboratrises por las maraviyas ke estan kreando i por el guste de ekspozarlas al puevlo.
