Entre los siglos XVIII i XIX, el governo britaniko deporto mas de 150,000 konviktos a las koloniyas penales en Australia. Entre eyos se topavan dos djudios ke se yamavan Joseph Hyams i Simon Lear, ke tambien fueron konosidos komo los primeros dentistos de Australia.
Hyams, nasyo en Londres i fue enbiado a Sydney despues de ser kondenado por una kulpa, la razon de la kual no konosemos en 1813. Se konosyo despues komo un dentisto pratikante i un eksperto alimpyador de kayos “kon fasilidad i seguridad”.
Simon Lear yego a Australia kuatro anyos despues. El tambien anunsyo ke kitava kayos, i tambien ke aziya “dyentes artifisyales echos de la manera la mas perfekta i limpya los dyentes ke eran atakados de la hazinura ‘scorbit’ i otras deteryorasyones, trokando los dyentes en una kolor blanka i pura”.
Aunke no savemos de kualas kulpas fueron akuzados Hyams i Lear, savemos muy bueno ke no eran dentistos de verdad ni eran lisensiados. Un artikolo publikado en 1820 en la Sydney Gazette, eskrito al nombre de la asosiyasyon medikal australiana, avertisyo el publiko sovre estos falsos dentistos.
Hyams torno a su vida kriminal i finalmente muryo en una koloniya penal en Tasmanya. Ma Lear prospero, desvelopo su negosyo para inkluir artes okultas, i se topo i pratiko unas kuantas sirkonsizyones – brit mila australianas, komo un verdadero doktor.
Lear tambyen desho un matrimonyo: kuando muryo, desho su propiedad a varias institusyones de bienfezensya djudias, ke la komunidad djudia vendyo para ayudar a finansar la konstruksyon de la Gran Sinagoga de Sydney, i se puede dizir ke esta Sinagoga fue konstruida grasyas a los dyentes i kayos!!!
