El 2 de Desembre, primera noche de Hanuka se organizo una nochada maraviyoza en la sinagoga Bet-El de Caddebostan por la Fondasyon de La Sinagoga Hemdat Israel de Kadiköy. Un konserto de Cenk Rofe kon un stand-up de Jojo Eskenazi. El direktor de muzika i shefe de orkestra era Yusuf Cefi Sağlamlar, el produktor de muzika era Izzet Bana i el produktor jeneral era Momo Eskenazi Gözcü.
La sinagoga se transformo en un salon de aktividades kon una hanukiya muy ermoza en el lugar de onor. Un ekran jigante delantre del Ehal estava mostrando imajes i kolores maraviyozos.
Aviya un kokteyl kon kozikas ermozas de komer entre eyas las mini sufganiyot muy savrozas.
Siguro ke muestro puevlo, mizmo en savyendo ke el kokteyl era a las 19.30 i el konserto a las 20.30 empesaron a vinir desde las 18.30! Eyos pensaron ke ivan a apartar lugares para eyos i sus konosidos de antes ama la organizasyon fue muy muy buena grasias a Momo Eskenazi ke estava korriendo de ariva a abasho todo el tiempo. No desharon a dingunos ke entren al salon antes ke se avran las puertas ofisialmente. Esto fue a las 19:45 porke todo loke aviya de komer se eskapo en 15 minutos, mashalla!
Agora vendremos a la aktuasion. En primero, muestro kerido Hahambashi, Rav Isak Haleva i Rav Adoni empesaron la seremoniya de asender las primeras kandelas de Hanuka. Yo siempre topo ke es muy emosionante kuando una asistensia nombroza kantan de una boz una orasion o un kante. Akeya noche vinieron 500 personas al show. I de una boz se disho la orasion de Hanuka. Estava muy ermozo.
I Cenk Rofe salio a la shena. De verdad ke tenemos en este mansevo un talento muy muy grande. Tiene una boz maraviyoza i kanta a la perfeksion. Mozotros lo konosemos desde ke el tenia 8-9 anyos i ke viniya al Dostluk a djugar en muestras piesas de teatro. Ke maraviya! Cenk salio a la shena kon un repertorio, aparejado por Izzet Bana, enteramente en Ebreo. Las kantikas estavan animadas, ermozas kon ritmos ke estavan dando ganas de baylar. La orkestra estava una maraviya i Cenk mos avryo las alas de los korasones kon su boz de andjelo.
Despues salio Jojo Eskenazi a la shena kon una baglama! Desde ke la asistensia lo vido a Jojo, empesaron a riyir. Jojo izo un stand-up maraviyozo i la djente tanto se estavan pishando de la riza ke todos ke tenian los telefones apegados en las manos, travando el konserto, tuvyeron ke deshar los telefonos porke estavan en dos riyendosen. Por esto fue muy difisil topar fotos de Jojo en lo ke estava aktuando. Todos riyendo i dingunos travando fotos! De verdad, fue komo si todos komimos dos biftekes grandes, tanto bueno mos izo estas rizas!
Cenk kontinuo su program despues de Jojo i mizmo ke los dos kantaron una kantika endjuntos. El program se eskapo a las 22.30. Todas las 500 personas salieron del kal kon karas riyentes, orozos i kontentes de aver pasado una nochada maraviyoza.
Normalmente, para los ke moran en la parte evropea de Estambol, achakes del trafik dezgrasiado, es muy difisil ir a la parte asiatika ama kreyevos ke Alhad la noche, valyo la pena de ir a este show maraviyozo, trafik o no. Vos konti esto kon la sal i la pimienta porke estan pensando de azer una segunda nochada en Enero. Vos rekomendo, si no estavash ayi, de prokurarvos bilyetos lo mas presto posivle. Esto no se kachireya una sigunda vez. Vos anunsiaremos detalyos de aki siguro.
Hanuka alegre a todos kon sanedad, paz i alegria.
