Muy bien Keridos i Keridas,
Hanuka alegre ke tengamos todos kon sanedad, repozo i abondansya. Luzes ke no mos manke de muestras kazas. Hanuka es el festival de luzes i dulsuryas. Por esta okazyon vos kero eskrivir una resefta de sufganiyot ke es muy fasil de aparejar. Sufganiyot es el ponchik u un poko asemejando a los bimuelos ke konosemos.
Materyales menesterozos:
Azete para friyir
Para la masa:
En una torbayka de naylon ke se puede serrar bueno, aryento se inche kon:
2 kucharikas (de chay) de levadura
3 kupas (de agua) de arina
1 guevo
3 kucharas (de komer) de asukar
1 kupa de agua tivya
1 kuchara i medya de azete
Medya kuchara (de dulse) de sal
1 kuchara de brendi u de konyak
Kashkara de un limon rayado.
Esto todo ke se metyo aryento la torbayka se meskla komo si se apretava un kavesal. Se mete la torbayka aryento de una chanaka yena de agua tivya i se desha repozar una ora.
Dospues se toma la masa ke es de sustensya de apegarse en los dedos, se adelgaza kon un palo redondo u kon un rodiyo (merdane), se korta redondikos kon una kupa de agua. Los redondikos kortados se meten en una tavlayka duz, se kuvren kon una tovajika. I se meten a repozar otra medya ora.
Despues se friyen de dos partes.
Kuando ya se tivyeyaron, por un burakito aryento se inche de la marmelad ke se gusta.
Ke aprovechen. El Dyo ke mos ayege a fyestar Hanuka kada anyo kon todos djuntos i aunados, kon sanedad, alegriya, repozo i abondansya de todo lo bueno.
Al vermos.
