Muy keridas i keridos lektores,
Antes 15 dias izimos un viyaje muy maraviyozo al sud del pais. Viyajimos a Diyarbakır, Mardin, Midyat, Hasankeyf, Urfa i a Göbeklitepe. En primero vos kero kontar un poko de Diyarbakır. A las semanas ke vyene los otros lugares. La sivdad es situada en la parte norte de Mesopotamia, el el bodre del rio Tigris (Dicle). La sivdad es datada de antes 7500 anyos. Kaji 26 sivilizasyones grandes se fundieron ayi. Se puede vijitar munchos lugares istorikos komo: el kastilyo (kale), las meshkitas de Ulu Cami, Melik Ahmet Pasha, Behram Pasha, Hz. Suleyman i la Eglizya de Meryem. El Ponte de Malabadi, el Ponte de Tigris, las kalejikas estrechikas komo labirentes, las kazas otantikas, el Muzeo Arkeolojiko, la Kaza de Cahit Sıtkı Tarancı, el Muzeo de Ziya Gokalp i munchos otros lugares.
Ya saveriyash estos faktos sovre esta sivdad:
La meshkita Ulu Cami ke fue transformada de eglizya a meshkita es la primera grande meshkita de Anatolia.
Un pedasiko de la tavla de krusifikasyon de Jezukristo se topa en Diyarbakır.
La unika Tora eskrita a mano sovre kuero de gazela (ceylan derisi) se topa ayi.
Las tombas de 9 profetas son situadas en esta sivdad.
Despues de Yerushalayim dizen ke para los djudyos la sigunda sivdad santa “Kalne” se topa ayi.
En Turkiya, la sola eglizya donde ainda se avla la lingua ke avlava Jezukristo esta ayi.
Las murayas de la sivdad (şehrin surları) son las mas antiguas murayas del mundo.
En el muzeo arkeolojiko se topan mas de 30 mil ovras antiguas.
Las kolonas de Ulu Cami fueron transportadas de diferentes partes de Anatolia ni una no asemeja a la otra.
El primer robot se konstruizo antes 900 anyos en el palasyo de los Artuklus.
La manta de seda ke kuvre el Kabe fue teshido en el Han Hasan Pasha.
Las komidas savrozas no keren dicho. Ma un poko yaglis i kon muncha pimyenta kolorada ke mos kemimos el paladar. Un pokitiko mas poko si era ya iva ser muy bueno para los estomagos sansibles ke tenemos.
Vos rekomendo de ir i ver i kaminar ayi. Al vermos.
PARA ETELİKA, Mİ AMİGA
Etelika la madre kerida
Se engrandesyo tu ija
Se va kazar esta semana
Las ijikas s’estan bolando de kaza
Deshandomos solikas.
Irenika ermoza
Era chikitika chikitika
Mos akodramos todos
Del dia ke es nasida
Los ojikos ermozikos
Kon la riza en la kara.
Agora esperamos todos
Ke no le manke
La riza de la kara
Ke tenga su famiya
Kon amor i prosperita
Ke te regale inyetikos
Ke te den alegria.
Te felisitamos todos
Kon esta kantika
Esperamos ke tu
Vas a ser siempre
Una madre alegre
Fiera de ti mizma
I de la fruta
Engrandesida en tu famiya.
La la la...
Esta kantika fue eskrita de la parte de tu amiga Mirey de famiya Karaso sesh dias antes de la boda. En el trentiprimer anyo de su kazamiento: 17.05.2010
