Diya de viernes kayo un haber a los ajanses, sovre el mundo de literatura. La literatura peryo un eskrivano grande Israelyano, Amos Oz. Su ija kerida echo un twitter i anonso ke su sinyor padre peryo la vida. Estava sufriendo de kanser i malorozamente no pudo salvarse.
Las ajanses eskrivyeron sovre el, kaji los mizmos haberes. Es Isrelyano, es nasido de 1939, es aktivisto i pasifisto sovre la situasyaon Palestina i Israel. Tenemes munchos livros, ke se transladaron al Turko. Todos pueden toparlos en la butika del Şalom. Yo lo konosi kon el livro “Aşk ve Karanlık”. El livro era sovre su propia vida. Sovre la biyografiya suya i sovre la istoria de Israel.
Amiga kerida, la jurnalista Nelly Barokas, en un reportaje maraviyozo suya, ke se publiko en el Şalom 1998, mos izo akodrar el modo de vida duro ke paso Amos Oz, durante el muevo Israel. Era militaryo en las gerras mas fuertes. 1967, Gerra de sesh diyas, 1973, gerra de Yom Kipur. En este kamino duro, peryo amigos keridos, a su sovrino i mas i mas kreaturas, mensevos, mujeres. Ma el tenia una linya kontra de la gerra. En el reportaje de N. Barokas las palavras de abasho, me vino muy remarkavle. Vos esto trasladando del Şalom. Puedesh meldarlo entero de los arshives.
“Yo nunka no digo, ‘Make love, not war’. La kontra de la gerra, no es amor es pas. “Shalom Ahshav” es un movimyento para ke venga pas a la tierra de los Palestinyanos i Israelyanos. Es un movimyento para topar solusyon. No kero mas gerra. Yo no kero gerrear. Yo no me ago militaryo por un pedaso de tierra mas, o por los lugares santos, o por benefisyo nasyonal. Ma si es la situasyon de murir o bivir, o situasyon ande estan atakando a mi libertad vo gerrear. Yo me esto apersivyendo ke ay una situasyon trajika en estas tierras. Mozos no tenemos otra patria. I ni los Palestinyanos lo tienen. La solusyon es azer pakto.”
