İhsan Koçulu es el maestro del kezo i el fue pionaryo en munchos proyektos de adelantar la fabrikasyon del kezo i la agrikultura. El esta dainda estudyando komo se amelyora i se adelanta la fabrikasyon del kezo gruyer. El es un eroe de los tyempos modernos. Dediko su vida a la rekonstruksyon de su kazal i es un djenero de savyo. El dyo mano kon mano kon su puevlo para fondar la baza siyantifika sovre la fabrikasyon del kezo. Kon la inkluzyon de las mujeres en la vida eduktiva i sosyal, el les izo pujar la onor i el estado respektuozo de la mujer. A mi avizo, para kada sivdad se kere una persona komo este senyor. El kreyó en su lucha i izo kreer a su puevlo. Komo de fakto, kreer es alkansar a la meata del kamino.
En la sivdad de Kars, ke se topa en el este de la Turkiya, en el kazal ke se yama Boğatepe, de una altituda de 2500 metros, kada demanyana i tadre se arekoje tonas de leche del deredor de este kazal, i se transporta a la mandra para produsir kezos. La ekolojiya de los produktos de leche i el konosimyento tradisyonal de la rejyon, le dyo una grande fama internasyonal a este kezo. Oy en dia, kon la reputasyon del kezo ke se espandyo, se esta vendyendo a munchos payizes del mundo. El sekreto esta en el kezo, en la leche, en la produksyon siyantifika i en el amor por el lavoro.
Aparte del kezo gruyer ke es el prinsipal produkto, ay otros 16 modos de kezos, miel i trigo ke se estan vendyendo de New York asta Hong Kong.
Boğatepe, es un kazal Malakano. Los Malakanos eran los Rusos ke refuzaron de kombatir en la gerra en los anyos 1800 i se izyeron moradores de aki. Aparte de los Malakanos, la djente ke paso por aya i ke les plazyo el lugar, los Almanes i los Suises ke kijyeron azer echo de kezo se instalaron en este kazal.
Kada primavera serka de mil turistos vijitan Boğatepe. Se estan organizando tures para ver este lugar, para dezayunar en el salon “Kafkas Kahvaltı Salonu” i para ver el primer muzeo del mundo de kezos ke se yama “Zavot Ekomuzeo”.
Kada karucha de gruyer peza entre 80 i 100 kilos. Para una karucha se nesesita 2 tonas de leche. Es un echo muy difisil i metikulozo. En kada paso de la produksyon se kontrola la dureza, el tono de la kolor amariya, la grandor de los ojos/burakos, el briyo, la konsistensya. Todo se kontrola por los artizanos ke konosen todo los detalyos del kezo.
Me konsejaron de ir a Kars i a Boğatepe. En la primavera tengo intisyon de irme. Si tenesh tyempo i vozotros aze un viyaje aya.
Al vermos.
