Alhad ultimo, me fui kon una amiga a vijitar la ekspozisyon de una sivdad fantastika kon muncha inyeve, “KARS”. Una sivdad ke se topa en el nord este (kuzeydoğu) de la Turkiya. El sentro provensyal (il merkezi) de Kars es una de las mas altas ke se topa en muestro pais. La populasyon es mas de 100.000 personas.
Es una sivdad yena de statuas i se puede dizir ke es la sivdad la mas yelada de la Turkiya. El primer sol nase aki, i la primera inyeve kaye a Kars.
Es una sivdad muy kultivada ande se pueden ver las trasas las mas vyejas de la istorya del mundo. Las kazas echas de pyedras del tyempo de los Rusos, la arkitektura de los Ermenis, Rusos i Otomanos mostran una diversita emportante.
“Kars” es una sivdad ke dyo emportansa al arte, literatura i a la muzika. El konservatuar de la sivdad es uno de los mas emportantes de la Turkiya.
El kurator de esta ekspozisyon fue “Emel BENBASAT” una manseva ke es amante de Kars, i es una fotografa reushida en su espasyo. Una ekspozisyon de 41 fotografos ke ampesaron a fotografiyar del anyo 2014 fina oy, i partisiparon aki kon 83 ovras.
Eyos fotografyaron las kuatro sezones de la sivdad en kondisyones klimatikas muy difisiles, en enverano, en invyerno kuando el tyempo estava muy yelado menos 32 grados i reusheron a refletar la atmosfera majika de “Kars”.
Esta ekspozisyon fue en un edifisyo istoriko de 137 anyos, en una eskola de los gregos ke se yama “Yuvakimyon Rum Kız Lisesi”. La sangre vital (can damarı) del turizmo de Kars es: la fabrikasyon del kezo, la peshka, kaminar kon kavayos enriva del lago Çıldır ke en invyerno se enteza, la djente lokal, esto todo se immortalizo por los fotografos.
Veramente, tyenen una kultura ke avre los korasones de las personas. Entre todos aviya 5 fotografiyas de “Emel Benbasat”, una fotografiya de “Anet Bonfil” i una de su marido i munchas otras.
Felisitasyones a todos ke izyeron grande esforso para kreer esta ekspozisyon.
Antes 2-3 semanas vijiti la ekspozisyon nomada “Las Identitadas Guadradas” (Saklı Kimlikler) de “Şeyla Gülman Niyego” en Kuruçeşme.
“Şeyla Niyego” es una artista, pintora, eskultora i tyene un gusto formidable.
La grande partida de la ekspozisyon era tablos ande aviya munchas figuras diferentes multikolor i las ekspresyones de estas figuras estavan refletando las diferensyas del estado de la psikolojiya de las personas.
Veramente muy reushido a analizar komo las personas kuando no tyenen gana, a vezes se meten una identidad falsa (sahte kimlik) en sus karas.
A parte de las pinturas teniya unas kuantas ovras de statuas muy diferentes.
“Şeyla” kon su esforso personal i perfeksyonista avanso en este espasyo i asistyo a munchas ekspozisyones.
Es una valor eksepsyonal de muestra komunitad, es un orgolyo para mozotros.
La kero felisitar por su talento, su kapachita i su esforso para pueder avansar en su kampo de pintora.
