Eliz Gatenyo
Kuando viene Purim, ya mos ampesamos a aparejar para Pesah. Kuando era yo chika, biviyamos todos los judios en el mizmo kartiye. Mizmo, todo el esnaf era judio.
De ke eskapava Purim, ya se ampesava a alimpyar las kazas, komo dizen “del dedo del piye, asta la kavesa”. Yo vos va kontar la limpyeza da Pesah en mi kaza. Siguro todas las vizinas aziyan yarish. Ken i ken va ser mas limpya i mas metikulosa. Agora lo yaman “mahalle baskısı”.
En mi kaza, mi mama ampesava a alimpyar la kaza de las kamaretas de echar. Se alevantavan las karyolas, se aharvavan las cheltes, se kitavan todas las vistimyentas de los almaryos, se enshavonavan los kashones, se lavavan i enkolavan los taponikos brodados de los kashones i las etajeres. Despues ke ya eskaparon de alimpyarsen estas kamaretas, se serravan kon yave para no entrar mas asta Pesah. Mi papa diziya: Si una vez se fuye Pesah, no viene mas atras. Ke estava diziendo? Pesah se fuye? Si se fuye, ande se va? No echavamos muncha atansyon a esto, mos paresiya ke estava azyendo shakas. Ma despues ke me engrandesi, entendi lo ke keriya dizir mi padre.
Las noches siguro ke kaliya entrar para echar i durmir. Mos desvistiyamos afuera de la kamareta, mos vistiyamos las pijamas i entravamos deskalsos aryentro, ke puedeser no se apege alguna miga de pan ensima el fostan o debasho de la pantofla.
Despues de las kamaretas de echar, era la sira del salon i de la kamareta de asentar. I akeyas kamaretas teniyan la mizma suerte. Viniendo a la kuzina. La kuzina entera se vazyava al kortijo. Se enkalavan las paredes. Despues ke ya se alimpyo la kuzina, se metiya los chinis, las kalderas i los aparatos de la lohsa, ke se empleyavan de Pesah a Pesah. Los ustensiles de entre el anyo se guadravan. Mas no entrava pan a la kuzina. Desparte de esto, todo lo ke era hames, se metiya aryentro de tenekes i pasavan tenekedjis para soldarlos (lehimlemek). No se kere dicho ke mi mama gerreyava kon prasas i espinakas.
Entremientes, alimpya aki alimpya aya, no entres aki no entres aya, mos kedavamos en el hol. Esto sureyava unos kuantos diyas. Imajinavos ke teniyamos de azer lesones aya, ande biviyamos 5 personas en una kamareta. Para mozotros era un koshmar. Paresiya ke estavamos aryentro de un kapan.
Ya viniya Pesah, bendicho el Dio ya se avriyan las puertas de las kamaretas, todo estava al miskle, briyando a los syete espejos. Mi nono ke morava kon mozotros aziya kal hamira. Mi padre trayiya un grande buketo de tulipanes (lale), su flor preferida. Mozotros, las dos ijas de kaza, aparejavamos la meza de seder. Komo mi padre era el mas grande de los 6 ermanos, todos viniyan ande mozotros para Seder. Tiyos, tiyas, primos, primas ets. Era una alegriya de verdad. Ma mi mama la poveretika muerta bolada de la kanserya, mos asentavamos a la meza i se ampesava la agada… A lahma anya...
