Aviya muncho tyempo ke me keriya ir al Kapalı Çarşı i grasyas al Dio, ya me salyo la okazyon de ir, kaminar i ver. Una muy kerida amiga de la eskola, Beyhan, ke es profesora en la Universita Teknika de Estambol, me telefona dizyendo ke se eskarinyo. Desidimos de irmos al charshi azer un poko de peripayto i de merkar syertas kozas. Mos topimos en Kabataş, kon tramvay mos fuimos a Çemberlitaş i empesimos a kaminar de la Puerta de Nuruosmaniye para abasho, las kalejikas estrechikas. El charshi no estava muy kalabalik komo era entonses yeno de djente. La razon es ke no ay munchos turistos i ke no ay moneda ni gana de gastar. Kaminimos los djoyeros, los plateros, los tapeteros, los basmadjis, los antikeros. Entrimos a las butikas, izimos pazarlik bueno para no merkar nada. El djoyero Avedis Usta mos ofresyo chay, kafe. Los djoyeros grandes son los maestros Ermenis. Kale azer muncho pazarlik. Si los vendedores vos demandan 10, estavos siguros ke puedesh merkar la koza a 5. Por siguro ke el buto muestro era de kaminar i no merkar. Mos fuimos a Havuzlu Restorante ke es una lokanta de sinkuenta anyos djusto en el sentro del charshi istoriko del bazar manyifiko. La kozina Otomano-Turka ofresyendo komidikas de kaza muy baratas en un atmosfer uniko. Kaminimos el İç Bedesten, el Cevahir Bedesten ande en el tyempo Otomano i serkamente se organizavan subastas/müzayedes. Dospues salimos del charshi i abashimos a Mahmutpaşa kon una luvya i pedrisko bueno ke si no teniyamos parapluis mos se puediya burakar el tepe del meoyo. Kaminimos fina Eminönü, pasimos por el bien renomado Kuru Kahveci Mehmet Efendi, por los vendedores de peshkado, indjinaras, frutas, kezos, i por el Misir Charshi i bazar de flores.
Muertas boladas de la kanserya mos suvimos al otobus, ni mos kedo reflo de avlar. Siguro ke keriyash saver lo ke merkimos; un aniyo de birlantes, de diyamantes, un tifsin de plata, un kolye de perlas u un tapetiko de seda? Bien siguro ke no. Tornimos a kaza kon una papelerika de kafe Turko, un kalup de kezo blanko i komida para los gatos de mi amiga.
Ma estar kon amigas keridas vale mas de un aniyo de birlantes. Mezmo si no mos reunamos muncho, saver ke tyenes amigas semejantes, bever un kafe, komer, avlar de los rekuerdos i de lo muevo vyene muy bueno a la persona. A mi me izo efekto de terapi.
Bueno ke tenemos amigas i amigos keridos.
Ya mos vino Pesah. Vos oguro un buen Pesah a todas i todos, ke lo fyestemos kon alegriya, salud i kon savor de boka.
Al vermos.
