Eliz Gatenyo
La semana pasada ke estavamos fiestando Pesah, estuvimos en serkas relasyones kon los guevos. 7 guevos para los gatos, 8 guevos para el Tishpishti, 15 – 20 guevos para la meza de seder, no se kuantos guevos para los bimuelos i mas guevos para las frituras. Esto dicho, meldi un haber a este sujeto ke kero kompartir kon vozotros.
En las ekskavasyones de la sivdad de David en Yerushalayim, se topo kashkaras de guevos ke datavan del tiempo del primer Bet Amikdash. Estas kashkaras estavan todas rotas i los arkeologos las analizaron i las rekonstruizaron en empleyando la teknolojiya del 21. sieklo.
Asigun los estudyos dirijados por el Profesor Zohar Amar, de la Universita Bar Ilan, en Ramat Gan, los guevos konfirman ke en los tiempos Biblikos, los poyos tomavan parte en los pransos de la klasa alta de Yerushalayim.
En estos estudyos, se analizaron syenes de pedasikos de guevos, ke fueron topados entre las sinizas i los sierkoles de las ekskavasyones, por el arkeologo Eilat Mazar.
El Profesor Amar egzamino todos los pedasikos unos a unos, en empleyando una mueva i unika algoritma, developado por el Dr. Avshalom Karasik, de la Otoridad de Antiguedad de Israel, para la rekonstruksyon de las chanakas de oyas. El topo bastantes pedasos de kashkaras para rekonstruizar un guevo entero. En kompletando los guevos vieron ke eran 50 mm altos, 40 mm anchos i sus volumen era 61 cc. Egzaktamente el boy de los guevos de oy, modernos.
Esta deskuvierta tiene grande emportansa en la alaha Judiya. Por ke mos da a entender la mezura mensyonada en el Talmud, ke se yama “KABEYTZA” (= komo un guevo).
El Profesor Amar disho ke normalmente no se topan kashkaras de guevos en las ekskavaduras, por ke son muy frajiles. Otra emportansa de esta deskuvyerta es ke mos da la prova ke las gaynas se enkontraron mas antes, en Yerushalayim, ke en el Proksimo Oriente. Asta agora la unika topadura arkeolojika ensima las gaynas del tiempo Bibliko en Yerushalayim fue ke toparon unos kuantos guesos i unas kuantas estampas en el Royal House, ke mostravan una figura de un gayo ke estava peleyandose.
Amar va dar el mes ke viene una konferensya ensima de este estudyo, en la Universitad de Bar Ilan. El sujeto de la konferensya sera ensima de la agrikultura i la natura en Israel antiguo. I mas despues lo va publikar.
