Purim Purim Lanu, Pesah en la mano. Kijo dizir kuando vyene Purim, despues ya es Pesah. Purim es dulsuryas. Masapan kon muez, mavlachas koloradas kon blanko, todo muy savrozo. Despues ay los aparejos de Pesah. Afilu los zarzavatchis ya saven. El zarzavatchi konosido ya mos demanda. Ya vino el bayram de espinaka? Kuando es? Los zarzavatchis se aprontan para vender la espinaka, la prasa i las ojikas del apyo ke son muy emportante. Los kasapes ke venden karne kasher, lo mas muncho echo azen antes de los diyas de aparejos. Solo kon esto no se eskapa, Guevos, bimuelos, rulikos de berendjena, koftes de prasa, kodrero, bizelyas, patatas. No kale olvidar la indjinara i el pishkado. No se arta el ojo. Kale i dulsuryas. Gatós de muez kale ke se tope. Tishpishti de muez o de almendra. Kale aparejar el aharotsi para ti i para el ken no puede azerlo. Este modo de menus kaji en kada kaza sefaradi son los mizmos.
Gizamos i gizamos i savemos burlarmos de lo ke azemos esto todo. En los grupes de Whatsapp aviya dos karikaturas ke me plazyeron muncho. La una era, las mujeres asentadas en el bodre de la pisina i esta amostrando antes de Pesah i despues de Pesah. Mashallah despues de Pesah todas remitidikas. I una karikatura ke me plaze es despues de senar la meza enriva de los chinis vaziyas, una mujer kansada, bolada echada. Estas dos karikaturas kaji ke vyenen kada anyo i me azen riyir i de otra parte me azen pensar.
Pesah Pesah Lanu, ya vino enverano. Agora komo se va dar estos kilos. Se eskapa Pesah, el diya ke vyene todos tyenen sohbet de dieta. Ken i ken va eskojer la dieta la mas popular. Kada anyo sale una mueva lista de dieta. Emprimero era Dr. Atkins. No vas a komer karbonidrates, solo proteinas. Ansina van a pasar tres semanas. No kafe, no chay. Despues un enfasyo. Ayde ya vinieron los kilos atras. Azeremos Dr. Dukan. Koza mueva. Dr. Dukan disho, vas a komer una semana proteina, una semana zarzavat. Ke kadar keres puedes komer i afilu vas a komer yulaf. Salyo otro disho kavayos sosh? Yulaf es para los kavayos. Solo komer zarzavat es para las vakas. I esta dieta al chop. El uno dize komer guevos es muy buen, el otro dize te va pujar la tansiyon i el kolesterol. Ayde i esto no valyo.
Kada anyo las dietas ke salen a la plasa paresen a la kaza de Djoha. Todos lo aboltan komo lo keren. Mirando a la mujeres, un anyo estan flakas, un anyo bastante godras. Lo mas mijor ke reushen a dar los kilos son ke aprovechan trokar las ideas i las kostumbres de komer.
Kada moda kon su karar. El Dyo ke no mos amarge la savor de la boka. Komeremos kon las famiyas grandes en las mezas de fiestas, kon todos djustos. Kon salud i beraha. Enveranada buena.
