SELİN TOLEDO
La semana pasada, la Universidad de TED en Ankara organizo su seksta aktividad konosida universalmente komo “Biblioteka Umana”. En esta aktividad personas kon identidades i eksperiyensias ke munchas vezes enfrentan prejudisios aktuan komo “livros”, ande los partisipantes (“meldadores”) pueden ambezarsen sovre sus istorias personales.
Esta aktividad viene preparada por estudiantes de la universidad ke lavoran totalmente voluntariamente. En la Universidad de TED, la Biblioteka se organizo por el grupo de voluntarios yamado “Logos Society”. Este anyo Logos Society organizo esta aktividad por la tresera vez i las preparasyones para la aktividad ke tuvo lugar el 24 i el 25 de Avril, empesaron ay un mez. Indemas de La Biblioteka Umana, Logos Society organiza filmos, simpozyos i un klub de meldadura. El objektivo de esta sosyedad es krear una konsiensia individual i kolektiva kontra la diskriminasyon.
En La Biblioteka de TED, se notava espesyalmente la gran kantidad de livros. Avia livro shizofreno, livro bipolar, gay, biseksual, transeksual, interseks, famiyas de individuales LGBT, i lavorador i lavoradora de seks, livro Alevi, Kurdo, Djudio, Arminesko, Kristiano, Musulmano, ets..
La aktividad funksiona de este modo: Por kada livro, ay un “guzano de livro”, la kual esta responsable de yevar los meldadores al livro i manejar los orarios de meldadura. Las meldaduras se pueden azer individualmente o en grupos de sinko-sesh i ay ke tomar randevu kon el guzano. Kada persona o grupo tiene 15 minutos en total para meldar, i durante la konversasyon un voluntario aspera serka del grupo para ayudar al livro kon kualkyera koza i informar a los meldadores kuando les keda poko tiempo: Estos responsables se yaman “observadores”. Los observadores tambien estan aya en el kazo ke el livro se sienta inkomodo kon algun meldador.
Los esforsos de los voluntarios de Logos eran muy visibles este anyo, izyeron todo lo posible para akomodar a los livros i los meldadores, indemas de lavorar de la manera mas efisiente posible.
La Biblioteka Umana se sige organizando durante toda la primavera i enverano en diferentes universidades de Turkiya i son okazyones ideales para avlar kon personas kon las ke pokas vezes mos topamos i tenemos un ambiente ande podemos azer demandas tan spesifikas.
