Eliz Gatenyo
Mi nono teniya un magazen de vistimientas. En este magazen se topava todo modo de vistimientas de ombres. Ampesando de mudantas, atletes, kamizas de poplin ke trayiyan de la Austria, brodadas kon inisyales del ke se la va vistir, pantalones, kostümes, kalsas, kalsados, chapeyos, chadires, paltos, pardesüs kashkoles i todo mas. Este magazen teniya tres kates, se yamava Zerafet, se topava djusto enfrente del gishe de Nimet Abla en Eminönü. En el anyo 1958 derrokaron todos los magazenes de akeya sira para azer una plasa grande.
Mi nono vendiya en detalyo i siguro muncho en groso. Lo mas viniyan klientes de Anadol. De las sivdades de Konya, Kayseri, İzmir, Adana i mas. Un diya vino un kliente de Kayseri. Merko dos, tres kozikas, las pago i se tomo a ir. Mi nono le demando, le disho kada ves merkas munchas kozas, deke oy merkates muy poko? El merkader de Kayseri le respondyo, por ke no tengo mas munchas paras a mi lado. Alora le disho mi nono, toma lo ke keres, kuando vas a vinir al otro mez, me las pagas. Se konvensyo el merkader i merko “kampos i vinyas”, i se fue… Allahaısmarladık – güle güle… sin sinyar un chek, un bono, nada.
Al mez ke vino, mi nono se fue al magazen komo kada diya a las 7 de la demanyanika, a avrirla kon nombre del Dio. El ke ve? El merkader de Kayseri, asentado de kukliyas, delantre del magazen i asperando a mi nono ke le va pagar su devda.
Agora malorozamente mos enkantamos de oyir este modo de kozas. Antes, dar una palavra era la onor de la persona. Komo meldatesh ariva, no aviya ni un chek ni un bono, nada, solo una promesa. I el de enfrente se kreyiya i se konfiyava a esta palavra. Ansina aviya onestedad aviya konfiyensa. Agora malgrado ke ay chekes, bonos, ipotekes, garantores i mas, ay muy poka djente ke paga su devda en su tiempo. I los ke no pagan, no toman ni la pena de ekskuzarsen i en vezes se desparesen.
Manteneremos la esperansa de tornar a los diyas de antes.
