Kuando vyene el mez de Ramazan ya se empesa a ver mas frekuentamente las datiles en los charshis i fustukchis. Kuando se kome kon yesod i karar, este fruto es un alimento muy benefisyozo. El arvole de datile es un chishit de palmiye kon ojas muy dekorativas. Estas plantas se topan en el deredor de la Mediteraneo i en el Medyo Oriente.
Kuando se toma u se korta tanid, komer unas kuantas datilikas aze repozar el puerpo, porke una datile kontyene 28 kaloriyas.
Los provechos de la datile son innumerables. Evita la konstipasyon i regula los movimyentos de los intestinos; es un alimento ke kontyene muncho potasyum i fierro, vyene bueno a la hazinura de ojo, punto amariyo, amingua la kanserya fizika i mental, da enerjiya i fuersa al puerpo, es bueno kontra la anemiya, ke es mankura de sangre. Alimenta al bebe de la mujer prenyada i puja la leche de la madre ke aleta. Vyene bueno para ulser i los renes, amingua el stres i la tansiyon, proteja kontra la maldicha hazinura, kontra las krizas de korason, bronshit, tos i abashada. Komo kontyene muncha vitamin K, da fuersa a los guesos, augmenta el poder sexual. Grasyas al potasyum ke kontyene, ayuda al engrandesimyento de los chikos. Para una diyeta de aflakar dizen ke kada diya se puede komer 21 datiles aryento de 3 tasas de yogurt. Datile kon yogurt es un buen alimento porke kontyene todo para tener la persona arta.
I un poko riyeremos: Mi ija dize ke la datile kuando se kome sin karar es bueno para inchir kulikos i göbekitos.
Al vermos.
