Muestro amigo, Alberto Modiano, despues de 40 anyos, empeso a estudiar en la universidad de Istanbul Ayvansaray, en el departamento de “filmos dokumentarios” i kon muncho orgulyo mos ambezamos ke el 16 de Junio 2019, tomo su diploma.
Le demandi a Alberto komo es ke le vino al tino de empesar de muevo la universidad. Esto es lo ke me disho:
Todo empeso kon un proje ke estava aziendo antes 3 anyos, “El Judaizmo en el Tiempo en el Espasio”. Despues de aver eskapado este proje, empesi otro ke se yamo, “Los Judios en la Vida Sosyal”. Entre estos, toma lugar la famoza profesora de bale de muestra komunidad, Lili Barokas. Eya me embiyo un regalo un dia, los filmos de 8mm ke su marido aviya travado de eya. Kuando mi mujer, ke es enamorada de filmos me demando, “kualo vas azer kon estos?” no supo ke responderle. Eya me disho de azer un filmo de estos. Yo le dishe ke no se komo azerlo i eya me disho, “va a la eskola i ambezate”.
Antes 40 anyos, era muy difisil entrar a la universidad por modo del estado politiko del pais. I yo aviya empesado a lavorar despues del lise. Los dalkavos 10 anyos de los 40 anyos de mi vida profesyonal komo fotografo pasaron en travando fotografias dokumentarias. I siempre keria ambezarme sovre los filmos dokumentarios. Antes dos anyos, entri a los egzamenes de universidad i gani el departamento de “Artes Visuales, Fotografia i Sinema”. En mizmo tiempo eskapi el programa de “Las Kulturas de Turkiya” i ize un dokumentario sovre la piesa teatrala, “KULA ‘930”. Este filmo se mostro en munchos lugares. En este momento el dokumentario sovre Lili Barokas, “Kerida Lili” ya se eskapo. Esta asperando ke se mostre. Mi tesis para eskapar la universidad se yamo, “La Kamareta Aleskura”.
Es komo mi mueva vida empeso el 16 de Junio, 2019. Esto muy muy orozo de poder eskapar la universidad despues de 40 anyos.
Kerido Alberto, te felisitamos de korason. Komo eskrivi en el titolo, no ay edad para ambezar. Lo ke se kere es la voluntad de la persona. Te auguramos munchos mas suksesos en tu vida.
