Eliz Gatenyo
Malgrado ke ya pasimos la fiesta de Shavuot, kije eskrivir este artikolo, por ambezarmos siertas kozas para “los ke no saven” i akodrarmos para “los ke ya lo saven”. Tanbien el artikolo kedo tadre por ke se kruzo kon la fiesta de bayram, todo estava serrado aki i el Şalom no se pudo publikar.
Deke es ke komemos kozas de leche en Shavuot? I kualas son las tradisyones en algunos payises del mundo?
Todos ya savemos ke Shavuot es la fiesta ande mos abasho el Dio la Tora (inkluso el kasherut) de los sielos a traves de Moshe Rabenu. Akel diya dainda el puevlo judio no estava pronto para el kasherut. Por esto se komyo solo kozas de leche. La Tora se kompara kon la miel, por esto lo ke se kome en Shavuot son mas muncho kozas dulses.
En la Persia (Iran) aparejan “Polao Mastrin” ke es aroz kon leche i “kolcha shiri” un sorte de cheese cake. En Gresya azen “Sutlag”, ke es un malebi kon muncha kanela. En Polonya la tradisyon es de azer cheese cake. En Libya azen figurikas de masa, i pretzel i las pasan a un ilo i azen kolyes para las ijikas. En Irak aparejan una masa i la inchen kon kezo, la meten al orno. Aki en Turkiya azemos sütlaç i dulse de roza. De una roza spesial ke gole muy ermozo de la kuala kitan agua de roza i una esans muy kara. Imajinavos ke para kitar un kilo de esans de roza se kere 4 tonas de rozas. Estas rozas enfloresen serka de Shavuot.
Se uza tanbien de dekorar los kales, siguro en kada payis diferentemente. En la Gresya dekoran los kales kon ojas vedres, en Buhara las dekoran kon flores koloradas. En Polonya desparte ke meten flores i ojas, meten tanbien i dekorasyones de papeles de kolores a kolores. En Alemanya meten dos ramos de ojas kon flores a los dos lados del Ehal, sembolizando ke la Tora es el Arvole de muestra Vida. Aki en la Turkiya las dekoramos kon rozas i flores blankas.
Shavuot es yeno de oportunidades para reunyones komunales i alegriyas. En Libya sarpikan aguas ensima de los ke pasan por la kaleja de los kales, por ke la Tora la asemejan a la agua, i muestra koneksyon a la Tora es una fuente de bendisyon. En Ethiopia se arekoje la komunita entera i komen panes i sereales todos enjuntos. En siertos Kibutzes de Israel, biven la parte agrikultural de esta fiesta. La plaza del kibutz es dekorada kon pajas i sestos de varios frutos i produktos, primerizas de la sezon. Vide en un kibutz ke izieron una parada kon los bebikos ke nasieron akel anyo i tanbien los kodrerikos i otros animales muevos nasidos. Kantes i bayles de los mansevos.
En el mundo entero los judios fiestan Shavuot de maneras a maneras. Ma esensyalmente se viene a la mizma idea. Una koza es muy sierto, ke la fiestemos un modo o otro modo, vamos a renkontrar una de las 70 fasas de la Tora.
Ke mos ayege el Dio a fiestar otras munchas
