Antes un mez i medyo asisti kon una amiga al viyaje de “Isparta” kon “Biz Bize Tur” ke apartyene a “Mordo Hazak” i “Cako Uyar”.
Mordo kon su mujer Sara assistyeron a este tur muy byen organizado. Todo estava pronto, nada no mos manko. A penas ke demandavamos kualker koza ya estava delantre de mozotros. Un tur profesyonal yeno de kerensya, i de amista entre todos los partisipantes. Un otobus de 40 personas i un gia de la sivdad salimos al kamino kuando arrivimos al aeroporto de Isparta.
Isparta es una sivdad ke se topa en la rejyon de la mar Mediteraneo. “Isparta” es konosida komo la sivdad ande se kultivan las rozas, las trandafilas de alta kalidad i la azete de trandafilas. La ekonomiya i la agrikultura de aki, es bazada sovre la roza. El 65 % de la produksyon de la azete de trandafila del mundo entero se produiza en Isparta. Kada anyo se aze un Festival de Trandafilas. Entremientes ay i munchas guertas de lavantas.
Pasimos tres kuatro dias maraviyozos en vijitando lugares istorikos, lagos, muzeos i kavernas… El primer dia mos fuimos al lago “Eğridir”, un lago ke tyene la agua dulse. Una kolor ke esta ampesando de vedre klaro i se esta indo fina la kolor blu. Una lokura de ver…
Las kolores del syelo kon las kolores de la tyerra muy armonyozos. Kontemplar esta armoniya esta deskansando a la persona.
Despues vijitimos la kaverna “Zindan Mağarası” ke tyene una largor de 760 metros i el punto el mas alto es 16 metros.
Esta kaverna es renomada ke invyerno i enverano aki se refujyan la koloniya de papasyegas (yarasa). Una kaverna muy byen illuminada, aryento fresko, las rokas ke se espedasaron i izyeron un kamino para ke las personas puedan kaminar aryento.
El sigundo dia ayegimos al lago “Kovada” ke tyene una karakteristika karstika, una kolor turkuaz, tyene una natura ekstravagante, unas bozes maraviyozas de los pasharos i de los patos. Estas bozes estan bozdeyando el silensyo del lago.
“Sagalassos”, la sivdad antigua se konstruizo a 1700 metros de altura; es una sivdad, un lugar ke deve de verse kon su Agora, su Bazilika Bizantina, kon su Avenida kon Kolonas i otras kozas enteresantes.
“Heron”, monumento de los eroes (kahramanlar anıtı) tyene una struktura empresyonante.
Las Fuentes; la fuente “Hadrian” se topa a 13 metros de altura, i kon las estatuas ekstraordinaryas es la parte la mas empresyonante de la sivdad antigua.
“El Lago SALDA”, la playa de arena blanka, la kolor turkuaz famoza en el mundo entero es una maraviya de la natura. La ondura 185 metros.
El lago “Salda” es el treser lago del mundo kon agua dulse, el treser lago de ondura i tyene una karakteristika emportante de ser el sinken lago el mas limpyo del mundo entero.
A la fin vijitimos “El Muzeo de Demokrasiya”, una ovra ke konta la vida enteresante de “Süleyman Demirel”, ke djugo un rolo muy grande en la Lucha de Sivilizasyon de 50 anyos de la Turkiya. “Süleyman Demirel” era el Prezidente de la Republika i este muzeo ke se avryo en el anyo 2014 mostra su vida entera. Aki puedemos ver munchos dokumentos, 45.000 livros, 32.000 jurnales i revistas, 126.000 fotografiyas i munchos regalos ke resivyo del pais mizmo i de los paizes etranjeros.
El dia de alkavo mos fuimos a la rekolta de las trandafilas para arekojer las ojas i azer dulse. Una kolor, una golor de rozas, una maraviya…
“Mordo Hazak” i “Cako Uyar” ke syempre tengash azlaha i beraha i puederemos asistir a los viajes inolvidavles ke estash organizando kon muncha atansyon i perfeksyonizmo.
